Ադրբեջանի ԶՈւ հանցավոր ներխուժումների պատճառով Գեղարքունիքի մարզի մի շարք գյուղեր զրկվել են ջրից, հայտարարել է Հայաստանի Մարդու իրավունքների պաշտպան Արման Թաթոյանը։
Ըստ նրա՝ տարվում է Կութ, Գեղամաբակ, Նորաբակ, Սոթք և այլ բնակավայրերի բնակիչների իրավունքների խախտումների փաստահավաք աշխատանք։
«Ադրբեջանի զինված ուժերը ներկա են այն տարածքներում, որոնք տեղի բնակիչներն օգտագործում են որպես արոտավայրեր և վարելահողեր: Այս ամենը հանգեցրել է նրան, որ խաղաղ բնակիչները հնարավորություն չունեն զբաղվել անասնապահությամբ: Այս այցի ընթացքում մենք հատուկ ուշադրություն կհատկացնենք ջրի խնդրին»,- ասել է Թաթոյանը։
Նա ընդգծել է, որ հատկապես սուր է խմելու ջրի մատակարարման հարցը, որը ստիպված բերվում է հարևան գյուղերից։
ՄԻՊ-ի խոսքով, երբ գյուղացիները փորձում են մոտենալ իրենց արոտավայրերին և զբաղվել գյուղատնտեսական աշխատանքներով, նրանց սպառնում են զինված ադրբեջանցիները։ Այսպիսով, Գեղարքունիքի բնակիչները բախվել են ոչ միայն անվտանգության, այլև սոցիալական ու տնտեսական խնդիրների։