ԱԺ–ն առաջին ընթերցմամբ ընդունեց չունեւոր պարտատուների օգնության մասին օրինագիծը

ՀՀ խորհրդարանը հոկտեմբերի 25-ին առաջին ընթերցմամբ ընդունեց «Դատական ակտերի հարկադիր կատարման մասին» եւ «Հրապարակային սակարկությունների մասին» օրենքում փոփոխությունների նախագիծը։ Նախագծին կողմ է քվեարկել 102 պատգամավոր, հայտնում է NEWS.am–ի թղթակիցը։ Օրինագիծը պետությանը պարտք չունեւոր քաղաքացիների համար բնակարանի երաշխիքներ է սահմանում։

Եթե պարտատուն ունի բնակելի անշարժ գույքի միայն մեկ օբյեկտ, ապա այն չի կարելի վաճառել հրապարակային սակարկությունների ժամանակ, եթե արժեքի 75 տոկոսը երաշխիքային գումարից քիչ է կամ հավասար։

Եթե բնակարանն ավելի թանկ է, ապա տարբերությունը կտրամադրվի տուգանքների վճարմանը, իսկ երաշխիքային գումարը կմնա նվազագույն արժեքով բնակարան գնելու համար։ Արդարադատության առաջին փոխնախարար Արթուր Հովհաննիսյանը հիշեցրեց, որ բնակարանը գնահատելու են ոչ թե դատական կատարողը, այլ անկախ գնահատողները։ «Մենք ասում ենք ոչ թե 100, այլ 75 տոկոս, քաղաքացուն եւս 25 տոկոս ենք թողում։ Այսինքն՝ եթե պայամանականորեն Կառավարությունը հաստատի բնակարանի նվազագույն երաշխիքը 7.5 մլն դրամ, ապա մենք երաշխավորում ենք բնակարանի ոչ թե 7.5 մլն դրամի, այլ 10 մլն դրամի անձեռնմխելիությունը։ Այս թվերը պայմանական են եւ միայն օրինակի համար են բերվում, իսկ վերջնական թվերը կհաստատի Կառավարությունը»,– ասել է Հովհաննիսյանը։

Նշենք, որ խոսքը միայն պետության առաջ ունեցած պարտքերի մասին է։