Երկուշաբթի ժամը 10:00-ի դրությամբ Երևանում ոստիկանությունը բերման է ենթարկել անհնազանդության ակցիաների 142 մասնակիցների, «Նովոստի–Արմենիա» գործակալությանը հայտնեց Ոստիկանության հասարակայնության հետ կապերի վարչության պետի տեղակալ Էդգար Ջանոյանը։
Նրանք բերման են ենթարկվել ՀՀ վարչական իրավախախտումների վերաբերյալ օրենսգրքի 182 հոդվածով (ոստիկանության ծառայողների օրինական պահանջները չկատարելը), նշել է Ջանոյանը։
Երկուշաբթի առավոտից անհնազանդության ակցիայի մասնակիցները փակում են Երևանի փողոցները, ինչպես նաև մայրաքաղաքից դուրս գտնվող մի շարք մայրուղիներ։
Ընդդիմադիր Ազգային կոմիտեի կողմից կազմակերպված անհնազանդության ակցիաների նպատակը տրանսպորտի շարժն ու պետական ապարատի աշխատանքը կաթվածահար անելն է։ Ընդդիմությունը մտադիր է հասնել Հայաստանի ներկայիս իշխանությունների հեռացմանը, որոնք չեն պաշտպանել Արցախը Ադրբեջանի ագրեսիայից։
