Հայաստանի 22 ՀԿ-ներ և բնապահպաններ իրենց խորը հիասթափությունը և դժգոհությունն են հայտնել «Ամուլսարում հանք շահագործելու վերաբերյալ ՀՀ կառավարության «ապօրինի, կարճատես, անպատասխանատու, արկածախնդիր, պետության համար վտանգներով հղի» որոշման կապակցությամբ։
Հայտարարության հեղինակներն իրենց բողոքն են հայտնել Ամուլսարի ծրագրի իրականացման դեմ՝ հաշվի առնելով անկառավարելի ռիսկերը։
Բնապահպանները մի շարք պահանջներ են ներկայացրել Հայաստանի պետական կառույցներին։ Մասնավորապես, պահանջ է ներկայացվել Հայաստանի նախագահին ապահովել ազգային անվտանգությունը և շրջակա միջավայրի պահպանությունը, տարածքային կառավարման և ենթակառուցվածքների նախարարությանը՝ դադարեցնել «Լիդիան Արմենիա» ընկերությանը տրամադրված ընդերքօգտագործման պայմանագիրը, Առողջապահության նախարարությանը՝ հրապարակել Ամուլսարի ծրագրի և մյուս հանքավայրերի՝ մարդու առողջության վրա ազդեցության՝ ՀՀ առողջապահության նախարարության կողմից իրականացրած «բոլոր փորձաքննությունների» արդյունքները, Գլխավոր դատախազությանը` հարուցել քրեական գործ և բացահայտել այն բոլոր պատասխանատուներին, որոնց մասնակցությամբ և թողտվությամբ տեղի են ունեցել շրջակա միջավայրի վրա ազդեցության գնահատման և փորձաքննության թերացումները, որոնք հիմք են դրել Ամուլսարի խնդրահարույց նախագծի հանդուգն առաջխաղացման համար, կառավարությանը՝ հրաժարվել Ամուլսարի հանքավայրի շահագործման ծրագրից։
Չորեքշաբթի օրը Երևանում Հայաստանը, Եվրասիական զարգացման բանկը (ԵԱԶԲ) և Լիդիան Արմենիան ստորագրեցին փոխըմբռնման հուշագիր, համաձայն որի կողմերը պատրաստակամություն են հայտնում ներգրավել մոտ 150 միլիոն դոլար և ևս 100 միլիոն դոլար՝ այս փաստաթղթի շրջանակներից դուրս Ամուլսարի ոսկու հանքավայրի զարգացման համար։ . ԵԱԶԲ-ն կտրամադրի100 մլն դոլարի վարկ, ևս 50 մլն դոլարը կտրամադրի տեղական բանկը։ Հայաստանի կառավարությունը կստանա նոր ընկերության բաժնետոմսերի 12,5%-ը և կապահովի գործարքի ապահովագրությունը որոշակի ռիսկերից։ Շրջակա համայնքները ընկերությունից տարեկան 7 մլն դոլարի աջակցություն կստանան։ Գործարքի արդյունքում ակնկալվում է, որ ՀՆԱ-ն կավելանա մոտավորապես 1%-ով։ Բացի այդ, բյուջեի մուտքերը կկազմեն տարեկան մոտ 30-40 մլրդ դրամ, ինչը 20%-ով կավելացնի հանքարդյունաբերության ոլորտի եկամուտները։