Հայաստանի Ազգային ժողովը երեքշաբթի քննարկել է Վերին Լարսի անցակետում խցանումների խնդրի լուծմանն ուղղված նախագիծը։ Մասնավորապես, Հայաստանը վավերացրել է «Եվրասիական տնտեսական միությունում փոխադրումների հետագծման համար նավիգացիոն կապարակնիքների կիրառման մասին» համաձայնագիրը։
Ըստ ՀՀ ՊԵԿ նախագահի տեղակալ Աշոտ Մուրադյանի, ռուս գործընկերների հետ նախնական պայմանավորվածություն է ձեռք բերվել, որ կապարակնիքներում նախատեսված տեղեկատվության առկայության դեպքում հայկական բեռնատարները հնարավորություն կունենան ավելի արագ անցնել ձևակերպումները։
Համաձայնագիրն ուղղված է փոխադրումների իրականացման ընթացքում պետական ստուգումների կրճատմանը և օրինական առևտրի ապահովմանը։ Նավիգացիոն կապարակնիքներն աստիճանաբար կներդրվեն՝ կախված տրանսպորտային միջոցներից և ապրանքների կատեգորիաներից։
Տրանսպորտային միջոցների կապարակնքումը կիրականացնեն ազգային օպերատորները, իսկ համաձայնագրով սահմանվում են նաև այն կետերը, որոնց վերաբերյալ ընթացակարգերը կարող են իրականացվել պետական մարմինների կողմից։
Մուրադյանը նշեց, որ նախատեսվում է նավիգացիոն կապարակնիքներ կիրառել ավտոմոբիլային և երկաթուղային տրանսպորտով փոխադրվող սանկցիոն ապրանքների, մասնավորապես` ալկոհոլային արտադրանքի, ծխախոտի և ծխախոտային արտադրանքի նկատմամբ:։
Ավելի վաղ Հայաստանի էկոնոմիկայի նախարար Վահան Քերոբյանը հայտնել էր, որ Ղրիմի կամրջի վրա տեղի ունեցած պայթյունից հետո Վերին Լարսի անցակետում (ռուս-վրացական սահմանին) հսկողությունը խստացվել է։
Ժամանակ առ ժամանակ լրատվամիջոցները հայտնում են, որ Վերխնի Լարսի անցակետում խցանումներ են գոյանում, ընկերությունները մեծ վնասներ են կրում արագ փչացող ապրանքների կորստի պատճառով։