Անհետ կորած ու զոհված զինծառայողների ծնողները իրավական գործընթաց են սկսել ընդդեմ զինվորական ղեկավարության։ Պահանջում են պատասխանատվության ենթարկել զինվորների մահվան մեջ բոլոր մեղավորներին։
Զոհված զինծառայողի հայր Գարիկ Մխիթարյանը «Փաստինֆո»-ին տեղեկացրել է, որ արդեն 70 զինծառայողի ծնող դիմել է իրավապահ մարմիններին՝ պահանջելով երեխաների մահվան հանգամանքները պարզելու համար քննություն իրականացնել ու պատժել մեղավորներին, սակայն առաջիկայում ներկայացված հաղորդումների թիվը կարող է հասնել 400-ի։
«Բարձրաստիճան պաշտոնյաները, գեներալները, վաշտի ու գումարտակի հրամանատարները պետք է ենթարկվեն պատասխանատվության։ Սպայական անձնակազմի սխալ հրամանների ու երիտասարդ տղաներին ռազմի դաշտում միայնակ թողելու պատճառով զոհվել են հազարավոր զինծառայողներ»,- ասել է նա։
Ծնողներն ասում են՝ անուններն իրենք գիտեն, սակայն դեռ նախընտրում են լռել։ Տվյալները ներկայացրել են իրավապահներին, եթե մեղավորներն օրենքի առաջ պատասխան չտան, ծնողներն են պատասխան պահանջելու մեղավորներից։