Ռուսաստանը փոխադարձ հիմունքներով վերացնում է COVID-19-ի պատճառով սահմանված ոչ կանոնավոր և կանոնավոր չվերթների սահմանափակումները դեպի Ադրբեջան, Հայաստան, Ղազախստան, Ղրղզստան, Տաջիկստան, Թուրքմենստան, Ուզբեկստան և Իրան, ասվում է Օդային տրանսպորտի դաշնային գործակալության մամուլի ծառայության հաղորդագրության մեջ։
«2022 թվականի մարտի 9-ին, Ռուսաստանի Դաշնության կառավարության որոշման համաձայն, ոչ կանոնավոր և կանոնավոր չվերթների սահմանափակումները դեպի Ադրբեջան, Հայաստան, Ղազախստան, Ղրղզստան, Տաջիկստան, Թուրքմենստան, Ուզբեկստան և Իրան, որոնք նախկինում մտցվել էին COVID-19-ի տարածման կանխարգելման շրջանակներում, վերացվել են»,- ասվում է հաղորդագրության մեջ։
Նախկինում ամբողջությամբ հանվել էին նաև դեպի Բելառուս, Դոմինիկյան Հանրապետություն, Եգիպտոս (բացառությամբ Կահիրե), Արաբական Միացյալ Էմիրություններ, Թուրքիա, Ֆինլանդիա, Չեխիա, Շվեյցարիա, Հարավային Կորեա և Կուբա թռիչքների սահմանափակումները։
Թռիչքները դեպի այդ երկրներ այժմ սահմանափակված են միայն օդային փոխադրումների վերաբերյալ միջկառավարական համաձայնագրերի և երկրների ավիացիոն իշխանությունների միջև առանձին համաձայնագրերի դրույթներով։
Կանոնավոր և ոչ կանոնավոր թռիչքներ կատարելիս ավիաընկերությունները պետք է հետևեն ՌԴ գլխավոր պետական սանիտարական բժշկի՝ «COVID-19-ի տարածումը կանխելու համար մեկուսացման ապահովման մասին» որոշման դրույթներին, հավելել են Ռոսավիացիայում։