ԱԺ փոխխոսնակ, «Հայաստան» ընդդիմադիր խմբակցության ներկայացուցիչ Իշխան Սաղաթելյանը չորեքշաբթի Ֆրանսիայի հրապարակում հրավիրված հանրահավաքում հայտարարեց այն հասցեները, որտեղից վաղը կսկսվեն անհնազանդության ակցիաները։
Նա նշեց, որ ակցիաները կմեկնարկեն վաղը առավոտյան ժամը 8-ին Գարեգին Նժդեհի հրապարակից, Կոմիտասի պողոտայի եկեղեցուց, Ավանի «Հարսնաքար» համալիրից, Նորքի զանգվածում գտնվող «Մեգամալ» առևտրի կենտրոնից, Սասունցի Դավթի հուշարձանից, Հանրապետական հիվանդանոցի այգուց, Լենինգրադյան-Սեբաստիա փողոցների խաչմերուկից և Ֆրանսիայի հրապարակից։
«Վաղն առավոտյան կրկին շարունակելու ենք մեր բողոքի ակցիաները։ Այլ տարբերակ չկա, մենք մեր քայլերով, գործողություններով պետք է մեր թիվն ավելացնենք, ծավալը մեծացնենք, և հասնենք մեր առաջ դրած նպատակին։ Առավոտյան ամբողջ կազմով միացեք բողոքի ու անհնազանդության ակցիաներին։ Սա շատ կարևոր է և անհրաժեշտ»,- ասաց նա։
Սաղաթելյանը հավելեց նաև, որ վաղը երեկոյան ժամը 19:00-ին Ֆրանսիայի հրապարակում տեղի կունենա ավանդական հանրահավաք։
Չորեքշաբթի առավոտից Երևանում շարունակվել են անհնազանդության ակցիաները։ Կենտրոնում շարժումը կաթվածահար է եղել, ակցիաներ են անցկացվել նաև Հայաստանի մայրաքաղաքի այլ շրջաններում։ Ժամանակ առ ժամանակ բախումներ են տեղի ունեցել ոստիկանների և ցուցարարների միջև։ Որոշ ժամանակ մետրոն չի աշխատել։ Ոստիկանության բաժիններ են տարվել 364 ակտիվիստ։