ՀՀ կառավարության այսօրվա նիստում ընդունած որոշմամբ ՀՀ կառավարությունը բնակարաններ նվիրեց մանկատան նախկին 166 շրջանավարտներին ու նրանց ընտանիքներին։
Ինչպես նախագծի ներկայացման ժամանակ հայտնեց ՀՀ աշխատանքի և սոցիալական հարցերի նախարար Զարուհի Բաթոյանը, այս բնակարանները 10 տարի առաջ անհատույց օգտագործման էին հանձնվել` հետագայում մասնավորեցման կամ վարձակալության պայմանով։
«Այս տարիների ընթացքում այդ բնակարաններում բնակվող մանկատան նախկին շրջանավարտների կողմից ներկայացվել են բազմաթիվ դիմումներ` դրանք մասնավորեցնելու խնդրանքով՝ հղում կատարելով պայմանագրի այդ կետին, բայց այդ դիմումներին որևէ ընթացք չի տրվել»,– հայտնեց նախարարը։
Այս կերպ կառավարությունը փորձում է լուծել մանկատան շրջանավարտների բնակարանային խնդիրը։
Բաթոյանը նշեց, որ հերթացուցակում ներառված, սակայն բնակարններ չստացած մնացյալ շահառուների համար 2019 թվականին մեկնարկեց «Բնակարանների գնման վկայագրեր տրամադրելու գործընթացը», և արդյունքում շրջանավարտներին հնարավորություն է տրվում ձեռք բերել բնակարան սեփականության իրավունքով:
«Այսպիսով, նույն իրավիճակով անձինք հայտնվեցին անհավասար պայմաններում, ուստի նախագծի ընդունմամբ կվերացվի այդ անհավասարությունը, և կամբողջացվի 1991-2019 թվականների մանկատան շրջանավարտների բնակարանային խնդիրների լուծումը»,- ասաց Բաթոյանը:
Այդուհանդերձ, ըստ վարչապետի, սրանով այդ անձանց սոցիալական խնդիրները չեն լուծվում։
«Բնակարանով մենք հարց չենք լուծում իրականում։ Եթե հետագայում փորձենք գնալ այն դեպքերի հետևից, կտեսնենք, որ բնակարան, այո, տվել ենք, դա լավ է հնչում, յուղոտ վերնագիր է, բայց հարց չի լուծում»,– ասաց Փաշինյանը` հավելելով, որ այս կարգի որոշումներն արդյունավետ են քաղաքական ղեկավարների համար` քաղաքական դիվիդենտներ շահելու տեսանկյունից, բայց ոչ շահառուների համար։
Բավ է պառակտվել