Հայաստանի քննչական կոմիտեն ՀՀԿ փոխնախագահ, կրթության և գիտության նախկին նախարար Արմեն Աշոտյանին մեղադրանք է ներկայացրել Քրեական օրենսգրքի երկու հոդվածներով։ Այս մասին հայտնել է նրա փաստաբան Տիգրան Աթանեսյանը։
«Նրան մեղադրանք է ներկայացվել պաշտոնեական դիրքի չարաշահման, որն առաջացրել է ծանր հետևանքներ, և փողերի լվացման հատկանիշներով»,- ասել է Աթանեսյանը։
Փաստաբանն ասել է, որ սա իրավական նոնսենս է և քաղաքական դրդապատճառներ ունի։
«Աշոտյանն ունի մեղադրյալի կարգավիճակ, խափանման միջոցը՝ ստորագրություն երկրից չհեռանալու մասին»,- ասել է Աթանեսյանը։
Նա հաստատել է, որ դա կապված է Երևանի պետական բժշկական համալսարանի նախկին ռեկտորի գործի հետ։
Աշոտյանը չորեքշաբթի մամուլի ասուլիսում նույնպես հայտարարել է երկրի իշխանությունների կողմից քաղաքական հետապնդումների մասին։
Ավելի վաղ ՀՀ գլխավոր դատախազությունը քրեական հետապնդում էր հայտարարել Երևանի պետական բժշկական համալսարանի (ԵՊԲՀ) նախկին ռեկտորի նկատմամբ, ով մեղադրվում է առանձնապես խոշոր չափերով՝ 39 միլիոն 660 հազար դրամի (ավելի քան 100 հազար դոլար) յուրացման մեջ։ Գերատեսչության տվյալներով՝ ԵՊԲՀ նախկին ռեկտոր Մ.Ն.-ն ինչպես անձամբ, այնպես էլ համալսարանի արհմիության նախագահ Մ.Ս.-ի օժանդակությամբ, դիտավորությամբ, վատնման եղանակով, ծառայողական դիրքն օգտագործելով, կատարել է առանձնապես խոշոր չափերով գույքի հափշտակություն (նշենք, որ 2012-2016 թվականներին ԵՊԲՀ ռեկտորն էր Միքայել Նարիմանյանը՝ խմբ.):