Ավան և Նոր Նորք վարչական շրջանների դատարանը հուլիսի 7-ին որոշեց երկու ամսով կալանավորել «Բարգավաճ Հայաստան» կուսակցության առաջնորդ Գագիկ Ծառուկյանին։ Նրան մեղադրում են առանձնապես խոշոր չափերի խարդախության և փողերի լվացման մեջ։
Դրան նախորդել էին հուլիսի 6-ի առավոտից սկսված խուզարկությունները Ծառուկյանի առանձնատանը և «Մուլտի Գրուպ» կոնցեռնի ընկերություններում։ Խուզարկությունների ավարտից հետո Ծառուկյանը ձերբակալվեց և տեղափոխվեց Քննչական կոմիտե։
Քննչական կոմիտեն պնդում է, որ Ծառուկյանը 2022-2024 թվականներին կազմակերպել է խարդախություն և փողերի լվացում։ Ծառուկյանն ինքը հերքում է մեղադրանքները՝ դրանք որակելով «սուտ, սարքած, փուչիկ»։
Ծառուկյանի փաստաբանը մեղադրանքները «աբսուրդային ու ծիծաղելի» է որակել՝ պնդելով, որ իր վստահորդը պետք է ճանաչվեր տուժող, ոչ թե մեղադրյալ։ Ծառուկյանի հետ միաժամանակ ձերբակալվել է ևս մեկ անձ։
Առանձին քրեական գործ է հարուցվել վայրի կենդանիների կամ թռչունների ապօրինի որսալու դեպքի առթիվ։ Ծառուկյանի տնից առգրավվել են տարբեր կենդանիների և թռչունների 190 խրտվիլակ, ինչպես նաև երեք առյուծ և մեկ վագր, որոնք ճանաչվել են որպես իրեղեն ապացույց։
Կենդանիները տեղափոխվել են Երևանի կենդանաբանական այգի, որտեղ առյուծներից մեկը, ըստ այգու, տարիքի և ուղեկցող հիվանդությունների պատճառով քնեցումից չի արթնացել։ Քննչական կոմիտեն հայտնել է, որ առյուծի մահվան հանգամանքները կդառնան քննության առարկա։
