Հայաստանի Հանրապետությունը «զանգվածային հայրենադարձությունը» ճանաչել է որպես ազգի ռազմավարական առաջնահերթություն, որպեսզի մինչև 2050 թվականը Հայաստանում բնակվի ավելի քան 5 միլիոն մարդ։ Այս մասին ասել է կառավարական մակարդակով հիմնվող Հայրենադարձների ինտեգրման կենտրոնի բացման աշխատանքների ղեկավար, հայրենադարձ Մարգարիտա Բաղդասարյանը։
«Այս նպատակին հասնելու համար անհրաժեշտ է, որ տարեկան 60 հազար սփյուռքահայ տեղափոխվի Հայաստան, ինչը զգալիորեն գերազանցում է ներկայիս ցուցանիշներն»,- ասել է Բաղդասարյանը։
Նրա խոսքով, Սփյուռքի գործերի գլխավոր հանձնակատարի գրասենյակը կառավարության մակարդակով հիմնում է Հայրենադարձների ինտեգրման կենտրոն, որը կօգնի հայրենադարձների բոլոր խնդիրները լուծել «մեկ պատուհանի» սկզբունքով։ Յուրաքանչյուր հայրենադարձի կտրամադրվի մասնագետ, ով կօգնի նրան բոլոր ոլորտներում՝ քաղաքացիություն ստանալուց մինչև աշխատանք:
Հանրապետության Ազգային վիճակագրական կոմիտեի տվյալների համաձայն՝ Հայաստանի մշտական բնակչությունը, 2011 թվականի մարդահամարի հիման վրա ընթացիկ հաշվառման տվյալների համաձայն, 2021 թվականի հուլիսի 1-ի դրությամբ կազմել է 2 964,6 հազար մարդ։ Միևնույն ժամանակ, 2021 թվականի հունվարի 1-ի դրությամբ Հայաստանի բնակչությունը կազմել է 2 963,3 հազար մարդ։
Իսկ ՄԱԿ-ի տվյալներով՝ Հայաստանի բնակչությունը մինչև 2050 թվականը կնվազի մինչև 2,7 միլիոն մարդ։