Հայաստանի բնակիչների վերաբերմունքն Արցախում ռուս խաղաղապահների առաքելության նկատմամբ վատացել է. Այս մասին հայտնել է «GALLUP International Association»-ի հայաստանյան ներկայացուցչության ղեկավար Արամ Նավասարդյանը՝ ներկայացնելով հարցման արդյունքները։
Այսպես, ըստ դրա արդյունքների, հարցվածների 18,3%-ը «լիովին դրական» է վերաբերվում Արցախում ռուս խաղաղապահների առաքելությանը, մինչդեռ 2020 թվականի նոյեմբերին այդ ցուցանիշը կազմում էր 37,8%։ Խաղաղապահ զորքերի տեղակայումը ավելի շուտ դրական է գահատել 32,1 տոկոսը (2020թ. նոյեմբերին՝ 43,7%) 18,3%-ը սրան վերաբերվում է «ավելի շուտ բացասական» (2020թ. նոյեմբերին՝ 4,6%), «լիովին բացասական»՝ 29,6%-ը (2020թ. նոյեմբերի 5,8%-ի դիմաց):
Հարցվածներին հարցրել են նաև, թե ինչպես են վերաբերվում Հայաստանում տեղակայված 102-րդ ռուսական ռազմակայանին. 24,3%՝ «լիովին դրական», 29,1 տոկոսը՝ «ավելի շուտ դրական», 14,8 տոկոսը՝ «ավելի շուտ բացասական», 22,6 տոկոսը՝ «լիովին բացասական»:
Հարցումը ցույց է տվել, որ հարցվածների 50,7%-ը դրական է վերաբերվում այս տարի Հայաստանում ՀԱՊԿ զորավարժությունները չեղարկելու ՀՀ վարչապետ Նիկոլ Փաշինյանի որոշմանը` ելնելով ստեղծված իրավիճակում դրանց անցկացման ոչ պատշաճ լինելուց։ Դրան բացասաբար է արձագանքել հարցվածների 39,5%-ը։
Հարցումը Հայաստանում անցկացվել է հունվարի 17-24-ը հեռախոսազանգերի միջոցով, որին մասնակցել է 1100 հարցված։