Ադրբեջանցի զինծառայող Հուսեյն Ախունդովը դատապարտվեց 20 տարվա ազատազրկման։ Դատավճիռը հրապարակվեց չորեքշաբթի Կապանի դատարանում, հայտնում է «Ազատություն»-ը։
Նա մեղավոր ճանաչվեց Զանգեզուրի պղնձամոլիբդենային կոմբինատի անվտանգության աշխատակից 56-ամյա Հայրապետ Մելիքսեթյանին սպանելու համար։
Ավելի վաղ Հայաստանի պաշտպանության նախարարությունը հայտարարել էր ապրիլի 10-ին և 13-ին Նախիջևանից հայկական տարածք ներխուժած երկու ադրբեջանցի զինծառայողների ձերբակալության մասին։ Ըստ առկա տեղեկությունների՝ նրանցից մեկին բռնել էին Սյունիքի մարզի Աճանան գյուղի երեք բնակիչ և մոտը հայտնաբերել Զանգեզուրի պղնձամոլիբդենային կոմբինատի սպանված պահնորդի հեռախոսը։
Ապրիլի 17-ին երկու ադրբեջանցի զինծառայողներն էլ ձերբակալվել են քրեական գործի շրջանակներում։ Նրանցից մեկին՝ Ագշին Բաբիրովին դատարանը 11 տարվա ազատազրկման է դատապարտել Հայաստանի սահմանն ապօրինի հատելու, պետական սահմանով հրազեն և ռազմամթերք ապօրինի տեղափոխելու համար։
