Մարդասպանության համար դատապարտված անձինք չպետք է համաներման ենթարկվեն, շաբաթ օրը լրագրողներին ասել է Հայաստանի վարչապետի պաշտոնակատար Նիկոլ Փաշինյանը։
“Բայց ես կարծում եմ, որ մենք իսկապես պետք է աշխատեցնենք պայմանական վաղաժամկետ ազատելու մեխանիզմը, պատժաչափերը փոխելու մեխանիզմը, ներման մեխանիզմը յուրաքանչյուր դատապարտյալին անհատական մոտեցում ցուցաբերելու համար”,-ասել է նա։
Ըստ Փաշինյանի, համաներումը անհատական մոտեցում չի ցուցաբերում, ընդհանրական մոտեցում է ցուցաբերում, այդ պատճառով գործերն անհրաժեշտ է մեկ առ մեկ ուսումնասիրել։
Հայաստանի կառավարությունը հոկտեմբերի 25-ի նիստին որոշում է կայացրել հոկտեմբերի 31-ին Հայաստանի Ազգային ժողովի արտահերթ նիստ հրավիրել։ Արտահերթ նիստի օրակարգում է “Էրեբունի -Երևանի 2800-ամյակի և Հայաստանի Առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին” օրենքի նախագիծը։