ԱԺ «Իմ քայլը» խմբակցության պատգամավորներ Մխիթար Հայրապետյանը և Անդրանիկ Քոչարյանը, ինչպես նաև անկախ պատգամավոր Արման Բաբաջանյանը հեղինակել են օրինագիծ, որով 27 տարին լրացած ՀՀ քաղաքացիները, որոնք չեն անցել պարտադիր զինվորական ծառայություն և գտնվում են քրեական հետախուզման մեջ, պայմանագրային զինվորական ծառայողի երկու տարվա աշխատավարձ վճարելու դեպքում կազատվեն քրեական հետապնդումից։
«Բացի այդ, վերոնշյալ գումարը վճարելուց և քրեական հետապնդումից արդեն իսկ ազատվելուց հետո առաջիկա երեք տարվա ընթացքում երկու տարի ժամկետով պայմանագրային զինվորական ծառայություն անցնելու դեպքում վճարված գումարն ամբողջությամբ հետ կստանան, ինչպես նաև հանրային ծառայության անցնելու հնարավորություն կստանան», - ֆեյսբուքի իր էջում հայտնել է Ազգային ժողովի «Իմ քայլը» խմբակցության պատգամավոր Մխիթար Հայրապետյանը։
«Պայմանագրային զինվորական ծառայողի երկու տարվա աշխատավարձի և հավելավճարների չափով գումարի վճարումը որպես քրեական պատասխանատվությունից ազատման հիմք տրամաբանական է, քանի որ պարտադիր զինվորական ծառայությունից խուսափած անձին փաստացի փոխարինում է պայմանագրային զինծառայողը, որի նկատմամբ պետությունը կրում է բազմաթիվ պարտավորություններ՝ այդ թվում վարձատրության պարտավորություն և դրա չափով վճարումը որոշակիորեն վերականգնում է սոցիալական արդարությունը:
Նշվածը ամենևին չի նշանակում, որ նպատակը գումարի գանձումն է, Նախագծով ֆիքսվում է գաղափարը և հիմնավորումն առ այն, որ դա ուղղված է առաջին հերթին սոցիալական արդարության վերականգնմանը: Այդ է վկայում նաև «Զինվորական ծառայության և զինծառայողի կարգավիճակի մասին» օրենքի 32-րդ հոդվածում կատարվող լրացումը, որով նախատեսվում է սահմանել, որ քննարկվող գումարը ենթակա է վերադարձման, եթե վճարողը երեք տարվա ընթացքում անցել է պայմանագրային զինվորական ծառայության երկու տարի ժամկետով: Այս պարագայում նպատակը ոչ միայն սոցիալական արդարության վերականգնումն է, այլ նաև անձի վերասոցիալականացումը» - ասված է նախագծի հիմնավորման մեջ: