Երեւանում մեկնարկել է ԱՄՆ Միջազգային զարգացման գործակալության (ԱՄՆ ՄԶԳ) կողմից ֆինանսավորվող Հայաստանի ԶԼՄ-ների զարգացման հնգամյա ծրագիրը՝ $15 մլն ընդհանուր բյուջեով, որից $4 մլն-ը դրամաշնորհներ են։
Ծրագրի նպատակն է աջակցել երկրում անկախ մեդիայի կայացմանը։
ԱՄՆ ՄԶԳ հայաստանյան առաքելության ղեկավար Ջոն Ալելոնն ասաց, որ ԶԼՄ-ների ազդեցությունը Հայաստանում շատ կարևոր է մեդիայի ընդհանուր զարգացման համար։
«Մենք ուշադրություն ենք դարձնելու ոլորտի բոլոր բաղադրիչներին, աշխատելու ենք տարբեր մակարդակներում, բայց հատկապես շեշտը դնելու ենք 4 միլիոն դոլարի դրամաշնորհի բաշխման վրա, որն ուղղվելու է ոլորտի զարգացմանն»,- ասաց նա։
Հայկական ԶԼՄ-ների զարգացման ծրագրի տնօրեն Կորինա Չեպոյն ընդգծեց, որ ծրագիրը կբարելավի լրագրության սկզբունքները, կխթանի հանրային հետաքրքրություն ներկայացնող լրատվամիջոցների մրցունակությունը և ֆինանսական կենսունակությունը, ինչպես նաև բարենպաստ միջավայր կստեղծի հասարակությանը հանրային ապատեղեկատվությունից պաշտպանելու համար:
Ծրագիրն անմիջականորեն կաշխատի հայաստանյան լրատվամիջոցների ներկայացուցիչների, լրագրողների, խմբագիրների, մենեջերների և այլընտրանքային բովանդակություն ստեղծողների հետ: Ծրագրի շրջանակներում կանցկացվեն խորհրդատվություններ և դասընթացներ՝ ուղղված լրագրողների և լրատվական կազմակերպությունների կայուն զարգացմանը։
