Երեքշաբթի ժամը 11:30-ի դրությամբ «Սուրմալու» առևտրի կենտրոնում տեղի ունեցած պայթյունի հետևանքով մահացած 16 քաղաքացիներից 13-ի ինքնությունը պարզվել է, տեղեկացրել է ԱԻՆ մամլո խոսնակ Հայկ Կոստանյանը։
Ըստ նրա՝ նրանց թվում են հղի կին և երեխա, որոնց մարմինները փլատակների տակից դուրս են բերվել այս գիշեր։
«Անհայտ կորածների թիվը կրճատվել է 10-ի, նրանց թվում կա Իրանի և Ռուսաստանի մեկական քաղաքացի»,- ասել է Կոստանյանը։
«Սուրմալու» առևտրի կենտրոնում պայթյունը՝ հետագա բռնկմամբ տեղի է ունեցել օգոստոսի 14-ին, ժամը 13.23-ին։ Նախնական տվյալներով՝ պայթել է հրավառության նյութերով պահեստը, մասամբ փլուզվել է եռահարկ շենք։
Ըստ ԱԻՆ-ի՝ բժշկական կենտրոններ է դիմել պայթյունի և հրդեհի հետևանքով տուժած 60 մարդ, նրանց մեծ մասը բուժօգնություն ստանալուց հետո դուրս է գրվել։
Տեղում աշխատում են շուրջ 100 հրշեջ և փրկարար, Կարմիր Խաչի, ՈՄԱ ՀԿ-ի, Ռուս-հայկական մարդասիրական արձագանքման կենտրոնի կամավորներ, բժիշկներ և հոգեբաններ, ներգրավված են հրշեջ-փրկարարական տեխնիկա, ջրատարներ, սանդուղքներ, տրակտորներ, ինքնաթափ մեքենաներ։