Սոչիի Ադլերի շրջանում տղամարդը որսորդական հրացանից կրակել է դատական կարգադրիչների վրա, որոնք եկել էին վտարել նրան դատարանի որոշմամբ, հայտնել են «Ինտերֆաքսին» չորեքշաբթի Սոչիի ՆԳՎ-ից։
«Ադլերի դատարանի որոշմամբ երկու դատական կարգադրիչ եկել էին ընտանիքին տնից վտարելու: Սեփականատերը որսորդական հրացանից կրակելով սպանել է նրանց», - հայտնել է ՆԳՎ ներկայացուցիչը:
Նրա խոսքով՝ միջադեպի վայրում աշխատում են իրավապահները։
«Տղամարդն ինքն է հայտնել սպանության մասին և հանձնվել ոստիկանությանն», - հաղորդել է աղբյուրը:
Տեղեկացված աղբյուրը «Ինտերֆաքս» -ին հայտնել է, որ դատական կարգադրիչները ժամանել են 61-ամյա Վարդան Քոչիյանի տուն` կատարելու ինքնակամ շինությունը քանդելու վերաբերյալ դատարանի որոշումը:
«Սակայն տղամարդը հրաժարվել է նրանց ներս թողնել, ինչպես նաև տնից դուրս գալ: Մի քանի րոպե անց նա որսորդական հրացանով կրակ է բացել դատական կարգադրիչների ուղղությամբ՝ սպանելով երկու մարդու», - ասել է գործակալության զրուցակիցը:
Կրակողը բերման է ենթարկվել: Նա ձերբակալման ընթացքում ոչ մի դիմադրություն չի ցուցաբերել, հավելել է աղբյուրը:
Իր հերթին, Սոչիի ադմինիստրացիայի մամլո ծառայությունը գործակալությանը հայտնել է, որ 2019 թվականին հայցադիմում է ներկայացվել Ադլերի շրջանի Պրոսվեշչենիե փող․ 81/2 հասցեով գտնվող կապիտալ շինարարության կառույցն ինքնակամ շինություն ճանաչելու վերաբերյալ:
«Սրանք մեկ հարկանի բարաքատիպ շենքեր են, որոնք տեղակայված են առաջին սանիտարական գոտում: 2020 թ. հոկտեմբերի 17-ին Ադլերի շրջանային դատարանի որոշմամբ Սոչիի ադմինիստրացիան բավարարել է հայցը: Կրասնոդարի երկրամասային դատարանի որոշմամբ Ադլերի շրջանային դատարանի որոշումը մնաց անփոփոխ», - ընդգծել են մամլո ծառայությունից: