Ձերբակալվել են «Էրո Տոմսկի» մականունը կրող օրենքով գողն ու հանցավոր խմբի երկու անդամ։ Այս մասին հայտնում են Հայաստանի քննչական կոմիտեից։
Քննությամբ ձեռք բերված փաստական տվյալների համաձայն՝ քրեական աստիճանակարգության բարձրագույն «օրենքով գողի» կարգավիճակ ունեցող Ա.Ջ.-ն, ով հայտնի է «Էրո Տոմսկի» մականունով, ղեկավարել է հանցավոր խումբ։ Մասնավորապես, նա գումար է հավաքել այսպես կոչված «գրեվի» համար, «լուծել» վիճելի հարցեր ու քրեական կանոններով «պատժել»։
Նախաքննությամբ Ստեփանավանի տարածաշրջանի մոտ 30 բնակարաններում խուզարկությունների արդյունքում հայտնաբերվել է տարբեր տրամաչափի շուրջ 30 պարկուճ, այսպես կոչված «գրեվի» գումար և տարբեր տեսակի ապրանքներ հավաքելու ցուցակներ։
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։