Հայաստանի աշխատանքի և սոցիալական հարցերի փոխնախարար Ռուբեն Սարգսյանը ներկայացրել է աշխատանքային օրենսգրքում փոփոխությունների նախագծի մանրամասները։ Նրա խոսքով, դրանք կհանգեցնեն գործատուի և աշխատողի համար աշխատանքային փոխշահավետ պայմանների ստեղծմանը։
Նախագծում, մասնավորապես, անդրադարձ է արվել երեխաների աշխատանքի խնդրին: Փոփոխություններում նշվում է, որ երեխաները կարող են աշխատանքային գործունեությամբ զբաղվել միայն ուսումից ազատ ժամանակ։ Բացի այդ, նախագիծը հստակեցնում է երեխաների ներգրավվածության թույլատրելի ոլորտները, գործունեության տեսակները և ժամանակահատվածները։
Նախագիծը ներառում է նաև փոփոխություններ երեխաներին խնամող կանանց համար: Մասնավորապես, առաջարկվում է կրճատել մինչև մեկ տարեկան և երկու տարեկան երեխաներին խնամող մայրերի աշխատանքային օրը։
Բացի այդ, նախագծով առաջարկվում է մինչև երկու տարեկան երեխաներին խնամող մայրերի համար յուրաքանչյուր 3 ժամը մեկ կեսժամյա ընդմիջումներ սահմանել։ Ցանկության դեպքում կանայք կարող են ինքնուրույն տնօրինել այս ժամանակը, օրինակ՝ ավելի ուշ գալ աշխատանքի կամ ավելի շուտ հեռանալ։
Միաժամանակ առաջարկվում է Աշխատանքային օրենսգրքից հանել այն կետը, ըստ որի՝ կենսաթոշակային տարիքի լրանալը կարող է հիմք հանդիսանալ աշխատողի հետ պայմանագիրը լուծելու համար։ բացի այդ, գործող օրենսգիրքը թույլ չէր տալիս թոշակառուների հետ անժամկետ պայմանագրեր կնքել․ այս կետը նույնպես կվերացվի։
Լրացուցիչ սոցիալական երաշխիքներ են տրամադրվում հաշմանդամության կենսաթոշակի իրավունք ունեցող նախկին զինծառայողի, ինչպես նաև ֆունկցիոնալության խորը աստիճանի սահմանափակմամբ հաշմանդամության կենսաթոշակ ստացող նախկին զինծառայողի կամ զոհված, անհայտ բացակայող կամ մահացած ճանաչված զինծառայողի ընտանիքի անդամի համար։ Մասնավորապես, աշխատողների կրճատման պարագայում նրանք արտոնություն կունենան։
Արձակուրդի մասով նախագծով առաջարկվում է փոփոխություն, ըստ որի՝ գործատուի համաձայնությամբ արձակուրդը կարող է տրվել աշխատանքային գործունեությունը սկսելուց վեց ամսից շուտ։ Նաև, եթե աշխատողը 2.5 տարվա ընթացքում չի ներկայացնում արձակուրդ գնալու դիմում, ապա գործատուն իր ցանկությամբ կարող է որոշել, թե աշխատողը երբ գնա արձակուրդ։
Առաջարկվում է նաև Աշխատանքային օրենսգրքում մտցնել «ուսումնական արձակուրդ» հասկացությունը, ըստ որի արձակուրդը կարող է տրամադրվել մինչև 2 տարի ժամկետով։
Նախագծով առաջարկվում է նաև հստակեցնել վստահության կորստի պատճառով աշխատանքից ազատելու մասին կետը։ Նշվում է, որ աշխատանքից ազատման պատճառ կարող են հանդիսանալ այնպիսի գործողություններ, ինչպիսիք են ուրիշի համակարգչից աշխատանքի համար ոչ անհրաժեշտ տեղեկատվության ստացումը կամ պատճենումը, աշխատանքային համակարգիչը վիրուսով վարակելը և նմանատիպ գործողություններ:
Նոր փոփոխությունները նաև պայմաններ են ստեղծում, որպեսզի գործատուն և աշխատողը փոխադարձ համաձայնությամբ դադարեցնեն համագործակցությունը իրենց ընտրած օրվանից, մինչդեռ գործող չափանիշներով աշխատողը պարտավորվում էր աշխատել մեկ ամիս՝ իր դիմումի համաձայն աշխատանքից ազատվելուց հետո։ Ավելին, եթե աշխատողը խախտի պայմանավորվածությունը և սկսի աշխատանքի չգնալ նախատեսված ժամկետից շուտ, նա ստիպված կլինի տուգանք վճարել։
Նախագծով առաջարկվում է նաև գործատուին և աշխատողին հնարավորություն տալ լուծելու հարցը արտադատական կարգով։
Սարգսյանի խոսքով, մեկ ամսվա ընթացքում նախագիծը լսումներ կանցնի խորհրդարանական հանձնաժողովներում և հաստատվելու դեպքում արդեն կներկայացվի պատգամավորների քննարկմանը։