Փոփոխություններ են կատարվել Հայաստանում հասարակական վայրեր այցելելիս QR կոդերի ստուգման կարգում, հայտնում է Հանրապետության առողջապահության նախարարությունը։
Այսուհետ հանրային վայրեր այցելելիս QR կոդի կանաչ հատվածը ցուցադրելը բավարար է անձի մուտքը թույլատրելու համար, «QR» կոդը սկանավորելու կարիք չկա։
Սակայն սկանավորելու պարագայում, քաղաքացիների անձնական տվյալների պաշտպանության համար, անձնական էջում ներառված տվյալները փակ կլինեն` բացի անուն, ազգանունից:
Հաղորդվում է նաև, որ Covid-ով վարակման պարագայում քաղաքացու հիվանդության փաստը «Արմեդ» հավելվածում արտածվում է կարմիր «QR» կոդով, և նրա վարակված լինելու ամբողջ ժամանակահատվածում բոլոր կանաչ «QR» կոդերը կդառնան մոխրագույն, իսկ առողջանալուց հետո դրանք նորից կկանաչեն:
Հունվարի 22-ից Հայաստանում արգելվել է չպատվաստված կամ բացասական PCR թեստ չունեցող քաղաքացիների այցելությունը հասարակական վայրեր և հանրային միջոցառումներ։ Փորձագետներն ու սոցցանցերի օգտատերերը այս խստացման մեջ նկատել են, մասնավորապես, անձնական տվյալների գաղտնիության մասին օրենքի խախտում։