Հայաստանում կբարձրանան կենսաթոշակները, նպաստներն ու սոցիալական աշխատողների աշխատավարձերը։ Այս մասին հինգշաբթի կառավարության նիստում 2023-2025 թվականների պետական միջնաժամկետ ծախսային ծրագրի նախագծի քննարկման ժամանակ հայտարարեց Հայաստանի ֆինանսների նախարար Տիգրան Խաչատրյանը։
Նախատեսվում է ավելացնել սոցիալական ապահովության ծրագրերի ծախսերը։ Արդեն 2023 թվականի ընթացքում սոցիալական պաշտպանությանն ուղղված ծախսերը կավելանան 65 մլրդ դրամով կամ 11,3%-ով։ Նախարարի խոսքով՝ դա թույլ կտա ավելացնել կենսաթոշակներն ու սոցիալական աջակցության այլ ծրագրերով վճարումները։
«Մասնավորապես, դա թույլ կտա 33 մլրդ դրամով ավելացնել պետական կենսաթոշակների համար հատկացվող միջոցները, 16,5 մլրդ դրամով ժողովրդագրական իրավիճակի բարելավման ծրագրերը և այլն»,- ասաց նա։
Նախարարը նշեց, որ 2023 թվականին լրացուցիչ ֆինանսական միջոցներ կհատկացվեն սոցիալական աշխատողների աշխատավարձերի բարձրացման համար, այդ նպատակների համար նախատեսվում է հատկացնել 17,3 մլրդ դրամ։
«Առողջապահության ոլորտում 2023 թվականին սահմանված ֆինանսավորումը 22.3 մլրդ դրամով կամ 18.6%-ով կգերազանցի 2022 թվականի պետական բյուջեն, ընթացիկ ծախսերի աճը կկազմի 17.2 մլրդ դրամ, 2023 թվականին կապիտալ ծախսերն այս ոլորտում ընթացիկ տարվա համեմատ ավելի բարձր կլինեն 5,1 մլրդ դրամով»,- ընդգծեց նա։
Կրթության ոլորտի ծախսերի աճը կկազմի 31,6 մլրդ դրամ, ընթացիկ ծախսերըկավելանան 18,3 մլրդ դրամով, կապիտալ ծախսերը՝ 13,3 մլրդ դրամով։ 2023 թվականին գիտությանը կհատկացվի 36,3 մլրդ դրամ, ինչը 6,2 մլրդ դրամով ավելի է 2022 թվականի պետական բյուջեի նույն ցուցանիշից։
«Սա հնարավորություն կտա կառավարության ծրագրին համապատասխան շարունակել գիտաշխատողների աշխատավարձերի բարձրացումը, գիտական կենտրոնների ժամանակակից սարքավորումներով ապահովումն»,- ասաց նա։
Էկոնոմիկայի նախարարության մասով 2023 թվականին հատկացվել է 9,7 մլրդ դրամը գերազանցող գումար կամ 23 տոկոսով ավելի, քան նախորդ տարի։ Նախատեսվում է լրացուցիչ միջոցներ հատկացնել նոր սահմանված ծրագրերին, անասնաբուժության ոլորտում ներդրումային ծրագրերի խթանմանը (3,5 մլրդ դրամ), գյուղատնտեսության արդիականացման ծրագրերին (4,2 մլրդ դրամ)։
«Արդյունաբերական ենթակառուցվածքների, ճանապարհների, տրանսպորտի, ոռոգման, էներգահամակարգերի զարգացման համար նախատեսված է շուրջ 30 մլրդ դրամ ավել, ներառված են Հյուսիս-Հարավ ճանապարհի կառուցումը, ջրամբարների ու ոռոգման համակարգերի վերանորոգումը և այլ կարևոր ծախսեր»,- ասաց նա։
Խաչատրյանն ասաց, որ սուբվենցիոն ծրագրերի համար նախատեսված է 22 մլրդ դրամ, ինչը 4 մլրդ դրամով կամ 22 տոկոսով ավելի է, քան 2022 թվականին։
«2023 թվականին նախատեսվում է Արցախի Հանրապետությանը տրամադրվող աջակցության ծավալը պահպանել այս տարվա բարձր մակարդակի վրա՝ 144 մլրդ դրամի սահմաններում»,- ասաց նա ($1 - 408,31 դրամ):