Հայաստանի Հանրապետությունում թմրամիջոցների և հոգեմետ նյութերի ապօրինի շրջանառության, դրանց դեմ պայքարի և առկա խնդիրների վերաբերյալ խորհրդակցությանը վարչապետը կարևորել է այս ոլորտում ռազմավարության մշակումը։
Կառավարության ղեկավարը հանձնարարել սկսել այդ ուղղությամբ աշխատանքները:
Կառավարության մամլո ծառայությունը հայտնում է, որ խորհրդակցության ընթացքում վարչապետին ներկայացվել են վերոնշյալ թեմայի առնչությամբ կատարված ուսումնասիրության արդյունքները, որում անդրադարձ է արվում թմրամիջոցների ապօրինի շրջանառության հետ կապված իրավիճակին, դրանց տարածվածությանը, դեպքերի հայտնաբերելիությանը, բացահայտման վիճակագրությանը և այլն: Քննարկվել են պետական քաղաքականության շրջանակում իրականացվող վերահսկողական միջոցառումներն ու քայլերը:
Երեկ վարչապետի մասնակցությամբ Ոստիկանության գործունեության տարեկան հաշվետվության քննարկմանը հայտարարվել է, որ 2022 թվականին Հայաստանում թմրամիջոցների ապօրինի շրջանառության դեպքերի բացահայտման թիվը 2021 թվականի համեմատ ավելացել է 77 տոկոսով։
Նշվել է նաև, որ անցյալ տարի հանրապետությունում ստեղծվել է համացանցի միջոցով թմրամիջոցների անօրինական շրջանառության դեմ պայքարի մասնագիտացված ստորաբաժանում։
