Հայաստանի կառավարությունը հինգշաբթի նիստում հավանություն է տվել ինքնագնացների շարժը կարգավորելուն ուղղված փոփոխությունների նախագծին։
Ներքին գործերի փոխնախարար Արփինե Սարգսյանն ասաց, որ 18 տարեկանից բարձր քաղաքացիներին թույլատրվելու է ինքնագնաց վարել, կամ 16 տարեկանից բարձր անձինք, բայց «AM» կարգի վարորդական իրավունքով (մոպեդների, ինքնագնացների համար): Մինչև 18 տարեկան անձինք ինքնագնացներից կկարողանան օգտվել միայն առանձին տարածքներում, որոնք սահմանում է քաղաքապետարանի ղեկավարը։
Բացի այդ, նախագծում նշվում է, որ ինքնագնաց օգտագործող առաքիչներից կպահանջվի սաղավարտ կրել։ Ինքնագնացների առավելագույն արագությունը կսահմանափակվի ժամում 20 կիլոմետրով։
Փոխվարչապետ Մհեր Գրիգորյանն իր հերթին հավելեց, որ շուտով պետք է բարձրացվի նաև ապահովագրության հարցը, քանի որ ինքնագնացների օգտագործումը կարող է նյութական վնաս պատճառել երրորդ անձանց։ Նրա կարծիքով՝ նման դեպքերում վնասը պետք է փոխհատուցի վարձակալող ընկերությունը։
