Հայաստանի արտգործնախարարությունը հաստատել է Ադրբեջանից 10 հայ ռազմագերու վերադարձը։
«Եվրախորհրդի նախագահ Շառլ Միշելի միջնորդությամբ 10 ռազմագերի վերադարձել են հայրենիք»,- ֆեյսբուքյան իր էջում հայտնել է ՀՀ ԱԳՆ մամուլի քարտուղարը։
Գերատեսչությունը հրապարակել է նաև վերադարձած գերիների անուններն ու ծննդյան ամսաթվերը։
Եվրամիության միջնորդությամբ Ադրբեջանը կիրակի օրը Հայաստանին է փոխանցել 10 հայ զինծառայողի, որոնք գերեվարվել էին նոյեմբերի 16-ին երկու երկրների սահմանին տեղի ունեցած բախումների ժամանակ։ Այս մասին հայտնում է ТАСС-ը՝ հղում անելով ԱՀ ռազմագերիների, պատանդների և անհայտ կորած քաղաքացիների պետական հանձնաժողովին։
Նշվում է, որ Եվրամիության միջնորդությամբ Հայաստան է տեղափոխվել 10 հայ զինծառայող։
Ավելի վաղ՝ դեկտեմբերի 4-ին, Բաքուն Հայաստանին էր հանձնել նոյեմբերի 16-ի բախումների ժամանակ գերեվարված 10 հայ զինծառայողի։ Այն ժամանակ դա տեղի էր ունեցել ռուսական կողմի միջնորդությամբ։ Դրա դիմաց Երևանը Բաքվին է փոխանցել Ղարաբաղի ականապատ դաշտերի քարտեզները։