Երևանում 27-ամյա տղամարդը դանակով սպանել է մորը և վիրավորել հորը։
Ուրբաթ օրը, ժամը 03։45-ին Էրեբունիի ոստիկանական բաժնում հեռախոսազանգ է ստացվել “Էրեբունի” բժշկական կենտրոնից այն մասին, որ Նոր Արեշ 16-րդ փողոցում գտնվող տնից բժիշկները բուժհիմնարկ են տեղափոխել 2 քաղաքացու, որոնցից մեկը գիտակցության չգալով մահացել է ճանապարհին։
Ոստիկանությունը և քննիչները պարզել են, որ մահացած 61-ամյա Անժելա Կ-ն և վիրավորված Գասպար Ա-ն բնակվում էին նույն փողոցի 52/1 տանը։ Պարզվել է, որ Անժելան և Գասպարն ամուսիններ էին, իսկ դանակով հարվածները հասցրել է նույն հասցեով բնակվող նրանց 27-ամյա որդին՝ Արման Ա-ն։
Պարզվել է նաև, որ դրանից հետո Արմանը ինքն իրեն էլ է վիրավորել։ Տաք հետքերով նրան հայտնաբերել են, զինաթափել և տեղափոխել Էրեբունիի ոստիկանական բաժին։
Հարուցվել է քրեական գործ Հայաստանի ՔՕ 104-րդ հոդվածի 1-ին մասի (Սպանություն) և 34-104-րդ հոդվածի 1 մասի (Սպանության փորձ) հատկանիշներով։
