Հինգշաբթի օրը Երևանում ավտոսեփականատերերը բողոքի ակցիա են իրականացրել Կենտրոնական բանկի շենքի դիմաց ԱՊՊԱ վճարների թանկացման դեմ։
Ինչպես տեղեկացվում է Հայաստանի ավտոապահովագրողների բյուրոյի կայքում, 2022 թվականի փետրվարի 7-ից ուժի մեջ են մտնում ԱՊՊԱ-ի հաշվարկման նոր կանոնները, որոնց համաձայն, մասնավորապես, բազային սակագները կավելանան 1500-3000 դրամով (ավելի քան 3-6 դոլար):
«Մեր ակցիան ապաքաղաքական է, բայց, ինչպես ժողովուրդն է ասում՝ ձուկը գլխից է հոտում։ Հիմա հենց այսպիսի իրավիճակ է. Մենք հավաքվել ենք Կենտրոնական բանկի շենքի դիմաց, մեր ակցիան հասցեագրված է նրա ղեկավարությանը։ Մեր հաջորդ քայլը կլինի ավտոապահովագրողների բյուրոն: Մենք կփորձենք հասնել նրան, որ այս հիմար և անօրինական որոշումը բեկանվի»,- ասաց մասնակիցներից մեկը:
Նրանք հանդիպում էին պահանջում Կենտրոնական բանկի ներկայացուցիչների հետ՝ ցանկանալով հիմնավորված պատասխաններ ստանալ իրենց հուզող հարցերին։
«Մենք չենք ուզում դուրս գալ գրաքննության սահմաններից կամ անկարգություններ առաջացնել, բայց նրանք (իրավասու մարմինների ներկայացուցիչները - խմբ.) ամեն ինչ անում են, որպեսզի իրավիճակը դրան հանգի»,- ասաց ցուցարարներից մեկը։
Ցուցարարներն իրենց հետ պաստառներ ու թռուցիկներ էին բերել, որոնք մտադիր էին կպցնել Կենտրոնական բանկի շենքի մոտ գտնվող սյուներին, սակայն ոստիկանությունը զգուշացրեց նման գործողությունների անօրինականության մասին։ Այն բանից հետո, երբ ցուցարարներից մեկը թռուցիկ կպցրեց հենց Կենտրոնական բանկի շենքի մուտքի դիմաց, ոստիկանները նրան բերման ենթարկեցին։
Ցուցարարներին մոտեցավ ոստիկանության ներկայացուցիչը և հայտնեց, որ Կենտրոնական բանկից նշել են ցուցարաների հետ փողոցում հանդիպելու աննպատակահարմարության մասին և առաջարկել են ավելի արդյունավետ լինելու համար գրավոր ներկայացնել պահանջներն ու հարցերը, որոնց պատասխանը կտրվի սահմանված կարգով։