Հայաստանի քննչական կոմիտեում քննչական գործողություններ են տարվում Երևանի 27-ամյա բնակչի նկատմամբ սպանության փորձ կատարելու դեպքի հանգամանքները պարզելու ուղղությամբ, հայտնում է գերատեսչության մամլո ծառայությունը։
Դեպքի առթիվ ահազանգը ստացվել է օգոստոսի 18-ին՝ ժամը 01։40-ին «Սուրբ Գրիգոր Լուսավորիչ» բժշկական կենտրոնից, ուր «ձախ ստորանրակային շրջանի ծակած-կտրած վերք» ախտորոշմամբ բուժօգնության է տեղափոխվել տուժածը։
27-ամյա երիտասարդի մոտ ախտորոշվել է պարանոցի ձախ կեսի կտրած-ծակած վիրավորում շնչափողի վնասումով, երկկողմանի պնևմոթորաքս, ենթամաշկային էմֆիզեմա։ Նրա վիճակը գնահատվում է ծայրահեղ ծանր։
Դեպքի վայրի զննությամբ հայտնաբերվել և վերցվել են արնանման հետքեր, առգրավվել է տուժողի հագուստը, նշանակվել դատաբժշկական փորձաքննություն:
Ձեռնարկվում են անհրաժեշտ միջոցառումներ՝ դեպքի բոլոր հանգամանքները, ինչպես նաև ենթադրյալ հանցագործությունը կատարած անձի (անձանց) ինքնությունը պարզելու և հայտնաբերելու ուղղությամբ: