Հայաստանի ազգային անվտանգության ծառայությունը մեկնաբանել է ԶԼՄ-ներով և սոցիալական հարթակներով շրջանառվող լուրերն այն մասին, թե Հայաստանի տարածքով Ադրբեջանից դեպի Նախիջևան և հակառակ ուղղությամբ ավտոմոբիլային տարանցման դեպքում ՀՀ տեղական և միջազգային նշանակություն ունեցող ճանապարհները կփակվեն տարանցման ընթացքում։
«Դա չի համապատասխանում իրականությանը»,- ասված է գերատեսչության հայտարարությունում։
Նշվում է, որ կառավարության որոշման նախագծով նախատեսվում է 3 նոր անցակետի բացում, որոնցով հնարավորություն է տրվելու Ադրբեջանից ավտոմոբիլային տրանսպորտով տարանցիկ ուղևորվելու դեպի Նախիջևանի Ինքնավար Հանրապետություն։
«Ներկայում մշակման փուլում են գտնվում տարանցման հավանական (ավտոմոբիլային) երթուղիները և կարգը, որում Հայաստանի բնակչության, ինչպես նաև օտարերկրացիների ու վերջիններիս պատկանող տրանսպորտային միջոցների տեղաշարժի համար որևէ տեղական և/կամ միջազգային (միջպետական) նշանակության ճանապարհների փակում և/կամ այլ սահմանափակումներ չեն նախատեսվում»,- ասված է հաղորդագրության մեջ։
Նոր անցակետերի մասին
Հայաստանում շրջանառության մեջ է դրվել ՀՀ ԱԱԾ-ի հեղինակած նախագիծը Ադրբեջանի հետ սահմանին 3 նոր սահմանային անցակետ բացելու մասին։ Նախագիծը մշակվել է ելնելով օգոստոսի 4-ին կառավարության նիստի ընթացքում վարչապետ Նիկոլ Փաշինյանի տված հանձնարարականների կատարումն ապահովելու անհրաժեշտությունից։
2022 թվականի օգոստոսի 4-ին կառավարության նիստում ՀՀ վարչապետ Նիկոլ Փաշինյանը հայտարարեց Հայաստանի տարածքով Ադրբեջանի արևմտյան շրջանի և Նախիջևանի միջև կապ ապահովելու պատրաստակամության մասին։ Նա երաշխավորեց այս երթուղու անվտանգությունը Հայաստանի օրենսդրությամբ սահմանված կարգով։
«Եվ ոչ միայն Ղազախ-Իջևան երթուղու երկայնքով, այլ նաև Ղազախ-Բերդ, Վարդենիս, Սիսիան, Երասխ, Գորիսի հատվածներով, որտեղ վաղուց մաքսային հսկողություն է գործում, որից Ադրբեջանը երբեք չի օգտվել»,- ասաց նա։