Բավ է պառակտվել
01-06-2022 18:56

Երևանում մեկնարկել է կանանց և երեխաների երթը

Երևանի կենտրոնից՝ Ֆրանսիայի հրապարակից, մեկնարկել է կանանց և երեխաների երթը։

Երթը խորհրդանշական է և զուգադիպեցված է Երեխաների պաշտպանության միջազգային օրվան: Դրան մասնակցում են նաև պատգամավորներ, քաղաքական գործիչներ։

Չորեքշաբթի օրը հանդիպում է տեղի ունեցել Հայաստանի շուրջ 30 քաղաքական կուսակցությունների ներկայացուցիչների հետ։ Ընդդիմության նպատակն էր պարզել հասարակության դիրքորոշումը հայտարարության բոլոր կետերի վերաբերյալ, որի շուրջ «Հայաստան» և «Պատիվ ունեմ» խմբակցությունները հունիսի 3-ին նախաձեռնել էին Ազգային ժողովի արտահերթ նիստ։

Ընդդիմության հայտարարության համաձայն՝ Հայաստանը աջակցելու է Լեռնային Ղարաբաղի ժողովրդի ինքնորոշման իրավունքի լիարժեք իրացմանը և Լեռնային Ղարաբաղի Հանրապետության միջազգային ճանաչմանը։ Հայաստանի համար անընդունելի է ղարաբաղյան հակամարտության կարգավորման որևէ վերջնական տարբերակ, որի արդյունքում Արցախը կարող է հայտնվել Ադրբեջանի կազմում։ Հիշեցնենք, որ «Քաղաքացիական պայմանագիր» կուսակցության իշխանական խորհրդարանական խմբակցությունը (որի ղեկավարը վարչապետ Նիկոլ Փաշինյանն է) հրաժարվել է մասնակցել ընդդիմության նախաձեռնած հայ-ադրբեջանական և հայ-թուրքական հարաբերություններին նվիրված ԱԺ արտահերթ նիստին։

Անհնազանդության ակցիաները Հայաստանում

Ապրիլի 18-ից Հայաստանի ընդդիմադիր կուսակցություններն ու շարժումները բողոքի երթեր են կազմակերպում Երևանում, Հայաստանի քաղաքներում և գյուղական համայնքներում՝ կոչ անելով համախմբվել երկրի իշխանությունների գործողությունների դեմ և պահանջում են վարչապետ Նիկոլ Փաշինյանի հրաժարականը։ Ընդդիմությունը կարծում է, որ իշխանությունների քաղաքականությունը սպառնում է Հայաստանի և Արցախի անվտանգությանը.

Մայիսի 9-ից Երևանում ամեն օր մի քանի ուղղություններով ավտոերթեր և երթեր են անցկացվում, մի քանի ժամով շրջափակվում են կառավարական շենքերը։ Ոստիկանությունը բերման է ենթարկում ցուցարարներին՝ բիրտ ուժի կիրառմամբ։

Ավելի վաղ Հայաստանի վարչապետ Նիկոլ Փաշինյանը խորհրդարանում հայտարարել էր, որ միջազգային հանրությունը կոչ է անում Հայաստանին իջեցնել Լեռնային Ղարաբաղի կարգավիճակի հարցում նշաձողը, հակառակ դեպքում չի կարողանա օգնություն ցուցաբերել հայկական կողմին։ Այս հայտարարությունը լայն արձագանք առաջացրեց ինչպես Հայաստանում, այնպես էլ Արցախում։

Մեկ Երևան՝ երկու հակաիշխանական երթ․ Վանեցյանը բողոքի երթ է անցկացնում
Երևանում ընթանում է ընդդիմության երթը (հեռարձակում)
Երևանում երթեր ու բողոքի ակցիաներ են ընթանում (ուղիղ)
«Դիմադրություն» շարժումը երթ է սկսել Երևանում (ուղիղ)
Ընդդիմությունն իրազեկման երթ է անցկացնում Երևանում