Վայրի բնության և մշակութային արժեքների պահպանման հիմնադրամի (FPWC) տեսախցիկները Կովկասյան կենսաբազմազանության ապաստարանում (CWR) հովազի նոր առանձնյակ են նկարահանել։
FPWC-ի մամուլի ծառայությունից հայտնում են, որ կենսաբազմազանության ապաստարանի նոր բնակիչը կովկասյան հովազ է՝ սեռական հասուն արու առանձնյակ։ Նույն օրը մոտ երկու ժամ անց տեսախցիկները ֆիքսել են նաև երեք կիլոմետր հեռավորության վրա գտնվող Նեո հովազին։ Երրորդ առանձնյակը՝ Նովան, մյուս երկուսից մոտ վեց կիլոմետր հեռու է։
«Սա աննախադեպ փաստ է, երբ երեք տարբեր հովազներ միաժամանակ գտնվում են Կովկասյան կենսաբազմազանության ապաստարանի տարածքում»,- ասվում է զեկույցում։
Ինչպես նշել է FPWC-ի տնօրեն Ռուբեն Խաչատրյանը, հովազների պոպուլյացիան ամբողջ աշխարհում զգալիորեն նվազել է մարդկային գործոնի ազդեցության պատճառով, մասնավորապես՝ մեր տարածաշրջանում անդրսահմանային լարվածության, նոր սահմանների և արգելքների պատճառով։ Այս տեսակը գտնվում է անհետացման եզրին։
Վայրի բնության և մշակութային արժեքների պաշտպանության հիմնադրամը (FPWC) գործում է 2002 թվականից, Բնության պահպանության միջազգային միության անդամ է։ Հիմնադրամի գործունեության առանցքային ուղղությունը Հայաստանի բացառիկ կենդանական և բուսական աշխարհի պահպանությունն է՝ նորագույն տեխնոլոգիաների և ժամանակակից մոդելների կիրառմամբ։