«Սուրմալու» առևտրի կենտրոնում տեղի ունեցած պայթյունի էպիկենտրոնն, ըստ ԱԻՆ նախնական գնահատականների, եղել է մասնակի փլուզված (եռահարկ) շենքի կենտրոնական հատվածում, ասել է ԱԻ փոխնախարար Դավիթ Համբարյանը։
«Մեզ համար (պայթյունի) ընդհանուր պատկերը պարզ է, պայթյունը տեղի է ունեցել մոտավորապես շենքի կենտրոնական մասում՝ առաջին կամ երկրորդ հարկում, և պայթյունի ալիքը հարվածել է ձախ: Շենքի կենտրոնական և ձախ հատվածներն ամբողջությամբ ավերվել է»,- ասել է Համբարյանը Հանրայինի եթերում։
Ըստ նրա՝ պայթած նյութերը, ենթադրաբար, պատրաստի ճայթուկներն ու սարքերը, գտնվել են տարբեր հարկերում, դրանց տեսակը և ծավալը դեռ պետք է պարզվի։
Խոսելով տուժածների ու զոհերի մասին՝ Համբարյանը նշել է, որ այս պահին իրավիճակը չի փոխվել՝ 16 զոհ, երկու անհետ կորած։ «Շենքի բոլոր մուտքերը, ինչպես նաև շրջակա տարածքը ամբողջությամբ մաքրված են, փլատակների մեծ մասը մաքրված է, որոնողական աշխատանքներ են տարվում այն վայրում, որտեղ, ամենայն հավանականությամբ, անհայտ կորած քաղաքացիներ կարող են լինել»,- ասել է նա։
Փոխնախարարն ընդգծել է, որ կամավորների օգնության կարիքն այլևս չկա, քանի որ հիմնական աշխատանքն արդեն արված է, տեղում են միայն ԱԻՆ հատուկ նշանակության ջոկատի աշխատակիցները։ Առևտրի կենտրոնի տարածքում այս պահին աշխատում է շուրջ 120 փրկարար։
Նախօրեին ԱԻ նախարար Արմեն Փամբուխչյանը հայտարարել էր, որ, նախնական հաշվարկներով, մինչ պայթյունը Սուրմալու առևտրի կենտրոնում 4 տոննա պայթուցիկ նյութ է եղել։ Նրա խոսքով, որոնողափրկարարական աշխատանքների ավարտից հետո կքննարկվի գրեթե ամբողջությամբ փլուզված եռահարկ շենքի մնացած մասի ապամոնտաժման հարցը։
Օգոստոսի 14-ին, ժամը 13։23-ին «Սուրմալու» առևտրի կենտրոնում տեղի է ունեցել պայթյուն՝ հրդեհի բռնկմամբ։ Նախնական տվյալներով՝ պայթել է հրավառության նյութերով պահեստը, մասամբ փլուզվել է մոտ 2,8 քմ ընդհանուր մակերեսով եռահարկ շենք։
ԱԻՆ տվյալներով՝ պայթյունի հետևանքով զոհվել է 16 մարդ, 2-ը համարվում են անհետ կորած։ Տուժել է 62 անձ, այդ թվում՝ երեխաներ, նրանք տեղափոխվել են տարբեր բժշկական կենտրոններ։ Երեքշաբթի օրվա դրությամբ ստացիոնար բուժում է ստանում 7 քաղաքացի, մնացածներն անհրաժեշտ բուժօգնություն ստանալուց հետո դուրս են գրվել։ Որոնողափրկարարական աշխատանքների իրականացման տարածքը կազմում է 1 հա։
Օգոստոսի 17-18-ին Հայաստանում և Արցախում սուգ է հայտարարված։