Հրազդան քաղաքում այս գիշեր գողության մեջ կասկածվող տղամարդ է սպանվել։
Ոստիկանությունից հայտնում են, որ մարտի լույս 13-ի գիշերը ոստիկանության Կոտայքի մարզի օպերատիվ կառավարման կենտրոն է զանգել Հրազդան քաղաքի Վանատուր թաղամասի մի բնակչուհի և գողության մասին հաղորդում տվել։ Ահազանգով մեկնել են ոստիկանության Հրազդանի բաժնի օպերատիվ խումբը և պարեկային ծառայության Կոտայքի գումարտակի ծառայողները:
«Տղամարդը կացնով սպառնացել է ոստիկանության ծառայողներին։ Նրա հարձակումը կանխելու, ինչպես նաև իրենց կյանքին կամ առողջությանը սպառնացող վտանգը չեզոքացնելու համար կիրառվել է հրազեն։ Տղամարդը տեղափոխվել է «Հրազդան» բժշկական կենտրոն, որտեղ մահացել է», – հայտնում են գերատեսչությունից։
Պարզվել է, որ Հրազդանի 45-ամյա բնակիչը նախկինում դատապարտված է եղել։ Կատարվում է նախաքննություն: Հանգամանքները պարզվում են։
Shamshyan.com–ը ներկայացրել է միջադեպի մանրամասները` նշելով, որ չարագործը մուտք է գործել անասնագոմ գողության նպատակով։
Այն բանից հետո, երբ ժամանած պարեկները բարձրախոսով բազմիցս պահանջել են հանձնվել, նա կացինը ձեռքին դուրս է եկել շենքից և թափահարելով այն պահանջել, որ չմոտենան իրեն, հեռանան և չփորձեն բռնել, հակառակ դեպքում՝ ձեռքին եղած կացնով կսպանի բոլորին։
Պարեկներից մեկը նախազգուշական 2 կրակոց է արձակել օդ։ Սակայն այդ կրակոցներն էլ չեն կանխել քաղաքացու հարձակումը պարեկների ու ոստիկանների վրա, որից հետո զգալով, որ վտանգը դառնում է իրական` պարեկը 1 անգամ կրակոց է արձակել իրենց ուղղությամբ եկող տղամարդու վրա, վիրավորելով նրան։
