ԱՄՆ Գերագույն դատարանը մերժել է Թուրքիայի միջնորդությունը՝ դադարեցնելու հայցը՝ կապված ավելի քան հինգ տարի առաջ Վաշինգտոնում Թուրքիայի դեսպանի նստավայրի մոտ տեղի ունեցած բռնի ծեծկռտուքի հետ, որի հետևանքով ցուցարարները դաժան ծեծի են ենթարկվել, հայտնում է Associated Press-ը։
Միջադեպը տեղի է ունեցել 2017 թվականի մայիսի 16-ին, երբ խաղաղ հայ, քուրդ և եզդի ցուցարարները բողոքի ցույց էին անցկացնում Վաշինգտոնում Թուրքիայի դեսպանատան մոտ։ Արդյունքում տուժել է ինը մարդ, նրանցից երկուսը ծանր վնասվածքներ են ստացել։
Դատավորները չմեկնաբանեցին Թուրքիայի այն փաստարկի մերժումը, թե ԱՄՆ օրենսդրությունը պաշտպանում է օտարերկրյա պետություններին դատական հայցրի մեծ մասից։ Դատարանը որոշեց, որ Թուրքիան իրավական անձեռնմխելիություն չունի, և այդ պաշտպանությունը չի տարածվում 2017 թվականի մայիսի 16-ի դեպքերի վրա, երբ Թուրքիայի նախագահ Ռեջեփ Թայիփ Էրդողանի այցի ժամանակ «թուրքական անվտանգության ուժերը դաժան բախման մեջ մտան ցուցարարների ամբոխի հետ»։
Գերագույն դատարանի գործողությունները թույլ են տալիս շարունակել դատավարությունները։ Ցուցարարները պնդում են, որ իրենց դաժանաբար ծեծել են բռունցքներով ու ոտքերով, վիրավորել ու սպառնացել։ Ըստ բողոքների՝ մի կին կորցրել է գիտակցությունը, իսկ մյուսները հայտնել են հետտրավմատիկ սթրեսի, դեպրեսիայի, ուղեղի ցնցումների և մղձավանջների մասին:
Դատարանը մի քանի ամիս հետաձգում էր որոշումը՝ խնդրելով Բայդենի վարչակազմի կարծիքը ներկայացված իրավական հարցերի վերաբերյալ։