Հայաստանի արտաքին գործերի նախարար Արարատ Միրզոյանը հայտարարել է, որ հայկական զինված ուժերը ականներ են տեղադրում իրենց տարածքում՝ Ադրբեջանի ագրեսիայի բարձր ռիսկի պատճառով։
«Մենք չենք հերքում, որ ՀՀ ԶՈՒ-ն Հայաստանի ինքնիշխան տարածքում իրականացնում է ականապատման աշխատանքներ և դա պայմանավորված է Ադրբեջանի կողմից ռազմական նոր ագրեսիաների իրականացման մշտապես բարձր ռիսկի հետ, ինչի ականատեսն ենք եղել ինչպես 2021թ․ մայիսին և նոյեմբերին, այնպես էլ 2022թ․ սեպտեմբերին»,- «Արմենպրես»-ի հետ զրույցում ասել է Միրզոյանը։
Նա անդրադարձել է նաև Ադրբեջանի այն շահարկումներին, թե իբր հայկական կողմը հայկական արտադրության ականներ է տեղադրել Լեռնային Ղարաբաղում։
Այս առնչությամբ Միրզոյանը արձանագրել է, որ ցուցադրված ականները ադրբեջանական կողմը հայտնաբերել է ոչ թե ԼՂ-ում, այլ իր կողմից 2021-22թթ. օկուպացրած Հայաստանի Հանրապետության ինքնիշխան տարածքներում և Բաքուն հիմա փորձում է դրանք օգտագործել քարոզչական նպատակներով: