Հայաստանից Վրաստան ջրհեղեղից վնասված երկաթուղու վերանորոգման հետ կապված աշխատանքները բավականին լավ տեմպերով են ընթանում, ասաց ՀՀ տարածքային կառավարման և ենթակառուցվածքների նախարար Գնել Սանոսյանը։
«Միգուցե մենք կարողանանք սկսել ավելի շուտ, քան կարծում էինք»,- ասաց նա՝ կառավարության նիստում ներկայացնելով երկրի հյուսիսում աղետի գոտու վերականգնման աշխատանքները։
Նա ասաց, որ մոտ ապագայում հնարավոր կլինի ամբողջությամբ օգտագործել երկաթուղին, սակայն մի շարք սահմանափակումներով։
Ավելի վաղ Հայաստանի վարչապետ Նիկոլ Փաշինյանը հայտարարել էր, որ ռուս գործընկերները մեծ աշխատանք են տանում ջրհեղեղի աղետի գոտում երկաթուղային գիծն ամբողջությամբ վերականգնելու ուղղությամբ։ «Հարավկովկասյան երկաթուղի» ՓԲԸ-ից հայտնում են, որ հունիսի սկզբի դրությամբ երկաթուղային ենթակառուցվածքի ութ վնասված հատվածներից երկուսում գնացքների երթեւեկությունը վերականգնվել է Սանահին կայարանից մինչև Այրում կայարան։ Երթևեկությունը դեռևս սահմանափակ է արագությամբ և շարժակազմի տեսակով։
Մայիսի 25-26-ը տեղացած տեղումների, ինչպես նաև Դեբեդ, Աղստև և Տաշիր գետերի վարարման հետևանքով արտակարգ իրավիճակ է ստեղծվել Տավուշում և Լոռիում։ Բնական աղետը խլել է 4 մարդու կյանք, ավելի քան 440 մարդ փրկվել ու տարհանվել է։ Այս երկու մարզերի ջրհեղեղից տուժած բնակավայրերը հայտարարվել են աղետի գոտի, վերականգնողական աշխատանքների համար հատկացվել է 300 մլն դրամ։ ($1 - 388,04 դրամ):
