Հայաստանում Միջազգային հանրապետական ինստիտուտի (IRI) սոցիոլոգիական հարցման նոր տվյալները ցույց տվեցին, որ չնայած վարչապետի հայտարարած “խաղաղության դարաշրջանի”՝ երկրի բնակչության մեծամասնությունը շարունակում է Թուրքիան և Ադրբեջանը համարել Հայաստանի համար հիմնական սպառնալիք ներկայացնող երկրներ։
Կազմակերպության կայքում հրապարակված հարցումը ցույց է տալիս, որ Թուրքիան որպես քաղաքական սպառնալիք ներկայացնող երկիր է համարում հարցվածների 90 տոկոսն, իսկ Ադրբեջանը՝ 75 տոկոսը։ Միևնույն ժամանակ հարցվածների 15 տոկոսը որպես սպառնալիք ներկայացնող երկիր նշել է Ռուսաստանը։
88 տոկոսի կարծիքով Թուրքիային համարում է նաև անվտանգային սպառնալիք, իսկ Ադրբեջանին չի վստահում հարցվածների 81 տոկոսը։ Հիմնական քաղաքական գործընկերներ են համարվում Ռուսաստանը և Ֆրանսիան (57 և 50 % համապատասխանաբար)։
Միաժամանակ, քաղաքացիների 68 տոկոսը վստահ է, որ Թուրքիան նեև տնտեսական սպառնալիք է հանդիսանում Հայաստանի համար։ Երկրորդ և երրորդ տեղերում են կրկին Ադրբեջանը և Ռուսաստանը (52 և 17 % համապատասխանաբար)։
Ինչ վերաբերում է երկրի զարգացմանը՝ հարցվածների 53 տոկոսը կարծում է, որ դրա համար հարկավոր է բարելավել հարաբերությունները Ռուսաստանի հետ, 35 տոկոսը՝ ԱՄՆ, 29 տոկոսն՝ Իրանի և 25 տոկոսը՝ Ֆրանսիայի հետ։ Հարցվածների միայն 5 տոկոսն է կարծում, որ հարկավոր է զարգացնել հարաբերությունները Թուրքիայի հետ։
Հարցումն անդրադարձել է նաև հայ-թուրքական հարաբերությունների կարգավորմանը, և արդյունքները հետևյալն են․ 29%-ը կարծում է, որ Թուրքիայի հետ պետք է հաստատվեն առանց նախապայմանների հարաբերությունները, 47%-ը գտնում է, որ Թուրքիայի հետ պետք է սկսել երկխոսությունը, սակայն Հայոց ցեղասպանության ճանաչման հարցը պետք է մնա մեր օրակարգում, իսկ 48%-ը կարծում է, որ Հայաստանը պետք է առաջադրի իր նախապայմաններն, օրինակ՝ Թուրքիան չպետք է միջամտի Լեռնային Ղարաբաղի գործերին։
Հարցվածների մեծամասնությունը կարծում է, որ Թուրքիայի և Ադրբեջանի հետ հաղորդակցությունների բացումը բացասաբար կանդրադառնա Հայաստանի տնտեսության վրա (համապատասխանաբար 59% և 53%)։ Միաժամանակ հիմնական տնտեսական գործընկերներ են համարվում Ռուսաստանը (61%), Իրանը (40%) և Չինաստանը (29%)։