Սամբոյի աշխարհի մեծահասակների առաջնությունը կանցկացվի 2023 թվականի նոյեմբերի 10-12-ը Երևանում։ Այս մասին հայտնում է Սամբոյի միջազգային ֆեդերացիան։
«Ֆեդերացիայի գործկոմի անդամները որոշել են հաստատել Հայաստանի թեկնածությունը՝ հաշվի առնելով այս տարվա հոկտեմբերին սամբոյի դեռահասների, պատանիների և երիտասարդների աշխարհի առաջնության անցկացման հաջող փորձը Երևանում»,- ասվում է հաղորդագրությունում։
2023 թվականին Երևանում կանցկացվի նաև ծանրամարտի մեծահասակների Եվրոպայի առաջնությունը։
Հոկտեմբերի 14-16-ը Երևանի Կարեն Դեմիրճյանի անվան մարզահամերգային համալիրում անցկացվել է սամբոյի դեռահասների, պատանիների և երիտասարդների աշխարհի առաջնությունը: Աշխարհի ավելի քան 20 երկրի շուրջ 500 մարզիկ-մարզուհիներ 3 օր շարունակ պայքարել են 55 հավաքածու մեդալների համար: Առաջին անգամ սամբոյի աշխարհի առաջնությունը ներառել է նաև երիտասարդների մարտական սամբոյի մրցամարտեր:
Հայաստանի հավաքականները հաջող ելույթներ են ունեցել աշխարհի առաջնությունում՝ նվաճելով 20 մեդալ՝ 1 ոսկի, 2 արծաթ և 17 բրոնզ:
