Ֆուտբոլի միջազգային ֆեդերացիան (ՖԻՖԱ) ֆրանսիական «Պարի Սեն Ժերմեն» ակումբի արգենտինացի հարձակվող Լիոնել Մեսսիին ճանաչել է 2022 թվականի լավագույն ֆուտբոլիստ։ Մրցանակաբաշխութանյ արարողությունը կայացել է երեքշաբթի գիշերը Փարիզում, հայտնում է ՏԱՍՍ-ը։
Լավագույնների եռյակում են հայտնվել նաև Մեսսիի թիմակից ֆրանսիացի Կիլիան Մբապեն և իսպանական «Ռեալի» ֆրանսիացի հարձակվող Կարիմ Բենզեման։ Մեսսին Արգենտինայի հավաքականի կազմում 2022 թվականին Քաթարում հաղթել է աշխարհի առաջնությունում և դարձել մրցաշարի լավագույն խաղացող։ Արգենտինացի հարձակվողն աշխարհի առաջնությունում դարձել է ութ գոլի հեղինակ, Մբապեն ինը գոլով դարձել է մրցաշարի լավագույն ռմբարկու։ Բենզեման Մադրիդի «Ռեալի» հետ 2022 թվականին հաղթել է Իսպանիայի առաջնությունը և Չեմպիոնների լիգան և դարձել երկու մրցաշարերի լավագույն ռմբարկու։
Մեսսին 35 տարեկան է, ՊՍԺ-ում հանդես է գալիս 2021 թվականի ամառվանից։ 2003-ից 2021 թվականներին արգենտինացին խաղացել է Բարսելոնայում, որի կազմում հարձակվողը տասն անգամ դարձել է Իսպանիայի չեմպիոն, յոթ անգամ հաղթել է Իսպանիայի սուպերգավաթը և Իսպանիայի գավաթը, չորս անգամ հաղթել Չեմպիոնների լիգան, երեքական անգամ՝ ՈւԵՖԱ-ի Սուպերգավաթը և աշխարհի ակումբային առաջնությունը: 2021 թվականին Մեսսին ռեկորդային յոթերորդ անգամ նվաճեց «Ոսկե գնդակը»՝ տարվա լավագույն խաղացողին տրվող մրցանակը։ Արգենտինացին ազգային հավաքականի պատմության լավագույն ռմբարկուն է (98 գոլ): 2021 թվականին նա նվաճեց Ամերիկայի գավաթը։
ՖԻՖԱ-ի վարկածով լավագույն խաղացողի մրցանակը շնորհվում է 2017 թվականից, Մեսսին երկրորդ անգամ է մրցանակ ստացել։ Պորտուգալացի Կրիշտիանու Ռոնալդուն և Լեհաստանը ներկայացնող Ռոբերտ Լևանդովսկին արժանացել են մրցանակին երկուական, իսկ խորվաթ Լուկա Մոդրիչը՝ մեկ անգամ
Տարվա խորհրդանշական հավաքականում ընդգրկվել են բելգիացի դարպասապահ Տիբո Կուրտուան (Ռեալ Մադրիդ), պորտուգալացի Խուան Կանսելոն (Բավարիա), հոլանդացի Վիրջիլ վան Դեյկը (Լիվերպուլ), մարոկկացի Աշրաֆ Հաքիմին (ՊՍԺ), բրազիլացի Կազեմիրոն (Մանչեսթեր Յունայթեդ) ), բելգիացի Կևին դե Բրույնեն (Մանչեսթեր Սիթի), խորվաթ Լուկա Մոդրիչը (Ռեալ Մադրիդ), նորվեգացի Էրլինգ Հալանդը (Մանչեսթեր Սիթի), Մեսսին, Մբապեն և Բենզեման։