«Ինտեր Մայամիի» հարձակվող, աշխարհի չեմպիոն Լիոնել Մեսսին անկեղծորեն խոսել է պորտուգալացի ֆուտբոլային աստղ Կրիշտիանու Ռոնալդուի հետ իր երկարամյա և լեգենդար մրցակցության մասին։ Ներկայումս արգենտինացին հանդես է գալիս ԱՄՆ-ում, իսկ Ռոնալդուն՝ Սաուդյան Արաբիայի «Ալ-Նասրում»։ Մեսսին բացահայտել է, թե ինչպես է ընկալել իրենց հարաբերությունները և ինչպես է դա ազդել ֆուտբոլային աշխարհի վրա։
«Նման բանը միանգամայն նորմալ է ֆուտբոլային աշխարհի համար», - նշել է Մեսսին։ «Կրիշտիանուն խաղում էր Մադրիդի «Ռեալում», ես՝ «Բարսելոնայում»։ «Էլ Կլասիկոներ», դերբիներ․ մենք երկուսս էլ պայքարում էինք թիմային և անհատական տիտղոսների համար։ Ֆուտբոլային միջավայրն ինքն է դրդում դրան։ Մրցակցելը, այս կամ այն տարբերակն ընտրելը նորմալ երևույթ է, որն առաջանում է ֆուտբոլում, ինչպես դա լինում է թիմերի կամ հավաքականների դեպքում։ Այս ամենը մնում է սպորտային հարթությունում, այդպես էր նաև այն ժամանակ։ Ճիշտ նույն կերպ մարդիկ համեմատում են նաև այսօրվա ֆուտբոլիստներին և ընտրում են այն, ինչ իրենց ավելի շատ է դուր գալիս»։
Արգենտինացի ֆուտբոլիստը նաև անդրադարձել է Ռոնալդուի հետ ունեցած անձնական շփումներին և մրցակցությանը․ «Կարիերայի ընթացքում և՛ նա, և՛ ես հասանք կարևոր արդյունքների, որոնք էլ ավելի սրեցին մրցակցությունը։ Մենք միշտ նշել ենք, որ մեր միջև մտերիմ ընկերություն չի եղել, քանի որ հազվադեպ էինք հանդիպում՝ բացառապես խաղերի կամ ինչ-որ միջոցառումների ժամանակ։ Միշտ մրցակցել ենք՝ կամ նա էր հաղթում, կամ՝ ես, բայց միշտ ամեն ինչ լավ էր ընթանում»։
«Այժմ մենք միմյանցից հեռու ենք, կյանքի տարբեր փուլերում ենք։ Բայց դա չի դադարել լինել սպորտի մի մաս և շատ ավելին: Մարդիկ հաճույք էին ստանում մեր մրցակցությունից՝ անկախ նրանից, թե ում էին երկրպագում։ Այդ մրցակցությունը շատ լավ անցավ և հավերժ կմնա ֆուտբոլի պատմության մեջ որպես մեծագույններից մեկը»։
