Սերբիայի նախագահ և Սերբիայի բանակի գլխավոր հրամանատար Ալեքսանդր Վուչիչը հրամայել է սերբական բանակը հասցնել մարտական ամենաբարձր պատրաստվածության աստիճանի, հայտնել է պաշտպանության նախարար Միլոշ Վուչևիչը։
«Սերբիայի նախագահը, որպես գերագույն գլխավոր հրամանատար (...) կարգադրել է, որ սերբական բանակը լինի մարտական պատրաստության ամենաբարձր՝ ռազմական ուժ կիրառելու, այսինքն՝ սերբական բանակի զինված ներուժի մակարդակի»,- հայտնել է Վուչևիչը Սերբիայի պետական Tanjug գործակալությանը, փոխանցում է Interfax-ը։
Նրա խոսքով, «դա պատրաստվածության ամենաբարձր մակարդակն է սերբական բանակի կողմից իրականացվող գործողությունների համար՝ պահպանելով Սերբիայի տարածքային ամբողջականությունն ու ինքնիշխանությունը, պաշտպանելով Սերբիայի բոլոր քաղաքացիներին և կանխելով ջարդերն ու ահաբեկչությունը սերբերի դեմ, որտեղ էլ նրանք ապրելիս լինեն»։
Պաշտպանության նախարարը նշել է, որ նախագահը հրամայել է բարձրացնել մարտական պատրաստվածությունը Կոսովոյում և Մետոխիայի ինքնավար նահանգում ստեղծված իրավիճակի պատճառով, հաշվի առնելով այն փաստը, որ Կոսովոյի ալբանական իշխանությունները շարունակում են նախապատրաստվել սերբերի վրա հարձակմանը և բարիկադների բռնի հեռացմանը։
Վուչևիչն ընդգծել է, որ Բելգրադը մտահոգված է միջազգային հանրության մեղմ արձագանքով և բանակցություններից հրաժարվելով, «քաղաքական երկխոսությից ոչ թե հետևանքների, այլ պատճառների մասին, որոնք ինքնավար մարզի սերբական համայնքին հանգեցրին նման քաղաքական պայքարի»։
Կոսովոյում և Մետոհիայում լարվածությունը սրվել և պահպանվում է այն բանից հետո, երբ Կոսովոյի ոստիկանությունը ձերբակալեց մի քանի նախկին սերբ ոստիկանների՝ 1998-1999 թվականների հակամարտության ընթացքում նրանց կողմից կատարված ենթադրյալ հանցագործությունների մեղադրանքով: Ի պատասխան՝ Կոսովոյում բնակվող սերբերը բարիկադներ կանգնեցրին նահանգի հյուսիսում գտնվող ճանապարհներին։
Սերբական բանակը լքել է Կոսովոն և Մետոհիան 1999 թվականին հակամարտությունից հետո: 2008 թվականին էթնիկ ալբանացիներով բնակեցված տարածաշրջանը միակողմանիորեն անկախություն հռչակեց Սերբիայից։ Արևմտյան շատ երկրներ ճանաչեցին այս քայլը, սակայն Բելգրադը շարունակում է այդ հողերը համարել սերբական պետության անբաժանելի մասը։
ՌԴ ԱԳՆ պաշտոնական ներկայացուցիչ Մարիա Զախարովան անցած երկուշաբթի նախազգուշացրեց, որ Կոսովոյի վերաբերյալ միջազգային իրավունքի և ՄԱԿ-ի Անվտանգության խորհրդի 1244 բանաձևի անտեսումը հղի է Բալկաններում լայնածավալ հակամարտության սկիզբով։