ԱՄՆ նորընտիր նախագահ Դոնալդ Թրամփը հայտարարել է, որ մտադիր է հանդիպել ՌԴ նախագահ Վլադիմիր Պուտինի հետ Արիզոնայում կայանալիք AmericaFest համաժողովի ժամանակ։ Նրա խոսքով՝ այս հանդիպումը միտված է Ուկրաինայում ռազմական հակամարտությունը որքան հնարավոր է շուտ վերջ դնելուն։
«Ցանկանում եմ հնարավորինս արագ կազմակերպել այս հանդիպումը։ Նախագահ Պուտինը ցանկություն է հայտնել մոտ ապագայում հանդիպել ինձ հետ։ Մենք պետք է վերջ տանք այս պատերազմին»,- ասել է Թրամփը։
Նա ընդգծել է, որ ուկրաինական հակամարտությունը ողբերգություն է և վստահություն է հայտնել, որ իր նախագահության օրոք այն չէր սկսվի։
«Այս պատերազմը սարսափելի տեսարան է. Ոչ ոք նման բան չի տեսել։ Մենք լսում ենք թվեր, որոնք ցնցող են։ Մենք պետք է դադարեցնենք սա: Սա աբսուրդ է։ Եթե ես լինեի նախագահ, այս հակամարտությունը երբեք չէր լինի»,- հավելեց նա։
Ավելի վաղ Վլադիմիր Պուտինը Թրամփի հետ երկխոսության պատրաստակամություն էր հայտնել՝ նշելով, որ իրենց հնարավոր հանդիպումը կարող է իմաստալից լինել։ «Եթե մեր հանդիպումը կայանա Միացյալ Նահանգների ընտրված նախագահ պարոն Թրամփի հետ, վստահ եմ, որ մենք խոսելու բան կունենանք»,- ասել է ՌԴ ղեկավարը մամուլի ասուլիսի ժամանակ։