Թուրքիայի նախագահ Ռեջեփ Էրդողանն ասել է, որ այլ երկրների կարծիքը չի կարող ազդել Ստամբուլի Սբ․Սոֆիայի տաճարը մզկիթի վերածելու որոշման վրա։ Ավելի վաղ ՌՈւԵ-ն տաճարի կարգավիճակի փոփոխությունն անվանել էր “ապտակ ամբողջ աշխարհի քրիստոնեությանը”։
“Թուրքիան Սուրբ Սոֆիայի կարգավիճակը թանգարանից մզկիթի փոխելու որոշում է կայացրել՝ հիմնվելով ժողովրդի ցանկության եւ կամքի վրա: Այլ երկրների կարծիքը չի կարող ազդել մեր որոշման վրա”,- ասել է պարոն Էրդողանը (մեջբերումն՝ Anadolu-ից)․ Նա նշել է, որ Թուրքիայի որոշումը քննադատում են պետությունները, որոնք ի վիճակի չեն պայքարել իսլամաֆոբիայի դեմ իրենց երկրներում։
Նախօրեին պարոն Էրդողանը հայտարարել էր, որ Ստամբուլում գտնվող Սուրբ Սոֆիայի տաճարը գտնվում է Թուրքիայի ինքնիշխանության ներքո, և մյուս երկրները պետք է հարգեն այն մզկիթի վերափոխելու որոշումը։
6-ից 15-րդ դարերում այս կառույցը եղել է քրիստոնեական եկեղեցի, 1453-ին թուրքերի կողմից Կոստանդնուպոլիսը նվաճելուց հետո`մզկիթ, իսկ 1934-ին Թուրքիայի Հանրապետության հիմնադիր Մուստաֆա Քեմալ Աթաթուրքի կառավարությունը ճարտարապետության այս հուշարձանին շնորհեց թանգարանի կարգավիճակ:
Հիշեցնենք, որ հուլիսի 10-ին Թուքիայի պետական խորհուրդը (երկրի բարձրագույն վարչական դատարան) թույլ տվեց փոխել բ․ Սոֆիա տաճարի կարգավիճակը, ինչից հետո պարոն Էրդողանը ստորագրեց համապատասխան հրամանագիր: Ռուս Ուղղափառ եկեղեցին Թուրքիայի իշխանությունների նախաձեռնությունը համարում է “կրոնական դավանանքի ազատության անընդունելի խախտում”: