Հյուսիսային Կորեայի ավելի քան 1,4 միլիոն երիտասարդ քաղաքացիներ «ցանկություն» են հայտնել միանալ բանակին Հարավային Կորեայի հետ սահմանային լարվածության ֆոնին, հաղորդում է Կորեայի կենտրոնական լրատվական գործակալությունը (KCNA):
«Ամբողջ երկրում ցանկություն կա պատժել Կորեայի Հանրապետության թշնամիներին, ովքեր խախտել են մեր սուրբ հայրենիքի ինքնիշխանությունն ու անվտանգությունը։ Հակամարտության դեպքում Կորեայի Հանրապետությունը կջնջվի աշխարհի երեսից։ Քանի որ այն ձգտում է պատերազմի, մենք պատրաստ ենք վերջ տալ դրա գոյությանը», - ասվում է գործակալության հայտարարության մեջ։
Ընդգծվում է նաև, որ երիտասարդների՝ բանակ գնալու պատրաստակամությունն արտացոլում է նոր սերնդի «վառվող ատելությունն ու վրեժխնդրության ցանկությունը», որը պատրաստ է զենքը ձեռքին պաշտպանել երկիրը պատերազմ սկսելու ձգտում ունեցողների դեմ։
Նախօրեին Հյուսիսային Կորեայի առաջնորդ Կիմ Չեն Ընը Սեուլին մեղադրել էր անօդաչու թռչող սարքերի միջոցով Հյուսիսային Կորեայի տարածք քարոզչական թռուցիկներ ուղարկելու մեջ, ինչը նա անվանել էր ռազմական սադրանք։ Ի պատասխան՝ նա պահանջել է «անհապաղ ռազմական գործողություններ»՝ պաշտպանելու երկրի ինքնիշխանությունը։
Դրանից հետո հյուսիսկորեացի զինվորականները պայթեցրել են Հարավային Կորեա տանող ճանապարհների երկու հատված։ Պայթյունները տեղի են ունեցել ԿԺԴՀ-ի տարածքում Կիոնիսոն և Դոնգհաե մայրուղիների երկայնքով. առաջինը կապում է Կաեսոն քաղաքը արևմուտքում հարավկորեական Պաջուի հետ, երկրորդը գտնվում է արևելքում։
Հարավային Կորեայի զինվորականները չեն տուժել և պատասխան կրակ են բացել երկու Կորեաները բաժանող սահմանազատման գծից հարավ: Սեուլը կարծում է, որ այդ գործողություններն ուղղված են երկրների միջև ցամաքային հաղորդակցությունների ամբողջական դադարեցմանը և պաշտպանական ամրությունների ստեղծմանը։
1945 թվականին Կորեան բաժանվեց Հյուսիսային և Հարավային Կորեաների՝ Երկրորդ համաշխարհային պատերազմի ժամանակ թերակղզին գրաված Ճապոնիայի հանձնումից հետո։ Սկզբում ԱՄՆ-ը և ԽՍՀՄ-ը նախատեսում էին ժամանակավոր բաժանում, սակայն 1950-1953 թվականների Կորեական պատերազմից հետո 38-րդ զուգահեռականով սահմանը դարձավ մշտական։ Ֆորմալ առումով պետությունները դեռ շարունակում են մնալ պատերազմական վիճակում, քանի որ խաղաղության պայմանագիր չի ստորագրվել։
Չնայած դրան, երկար տարիներ Հյուսիսային և Հարավային Կորեաները թերակղզու միավորումն իրենց նպատակ էին հռչակել։ Այնուամենայնիվ, անցյալ տարվա դեկտեմբերին Կիմ Չեն Ընը հայտարարեց, որ հրաժարվում է այս գաղափարից՝ նշելով, որ իրավիճակը թերակղզում դուրս է գալիս վերահսկողությունից՝ ԱՄՆ-ի և Հարավային Կորեայի «ռազմական սադրանքների» պատճառով։ Նրա խոսքով, պատերազմի հեռանկարը գնալով ավելի իրական է դառնում.
