Չինա-կանադացի միլիարդատեր Սյաո Ցզյանհուան՝ Tomorrow Holding կոնգլոմերատի հիմնադիրը, Չինաստանում դատապարտվել է 13 տարվա ազատազրկման ֆինանսական խարդախության համար։ Համապատասխան որոշումն ուրբաթ օրը կայացրել է Շանհայի դատարանը, հայտնում է «Pengpai» տեղեկատվական ռեսուրսը։
Դատարանը որոշում է կայացրել տուգանել Tomorrow Holding-ին 55,03 մլրդ յուանով (8,09 մլրդ դոլար) երկրի ֆինանսական օրենքների բազմաթիվ խախտումների համար։ Միլիարդատերը նաև տուգանվել է 6,5 մլն յուանով (955,8 հազար դոլար)։
Լսումների ընթացքում ապացուցվել է, որ Սյաո Ցզյանհուան բազմիցս խախտել է տեղական օրենքները, խոշոր գումարներ է յուրացրել պետական միջոցներից, մեքենայություններ է կատարել արժեթղթերը շուկայում և յուրացրել իր վերահսկողության տակ գտնվող ընկերությունների ակտիվները։
Սյաո Ցզյանհուան վերահսկում էր 1999 թվականին Պեկինում հիմնադրված Tomorrow Group-ը և զբաղվում է ներդրումային գործունեությամբ։2016 թվականին նա Չինաստանի 100 ամենահարուստ մարդկանց ցուցակում զբաղեցրել է 32-րդ տեղը՝ ըստ Huzhun բիզնես հրատարակության, նրա կարողությունը գնահատվել է 6 միլիարդ դոլար, իսկ 2014 թվականից նա ապրում է մայրցամաքային Չինաստանից դուրս, այդ թվում՝ Հոնկոնգում։
2017 թվականի սկզբին մամուլում տեղեկություններ հայտնվեցին Չինաստանի քաղաքական էլիտայի հետ սերտ ֆինանսական կապեր ունեցող գործարարի առեղծվածային անհետացման մասին։ South China Morning Post-ը, մասնավորապես, պնդում էր, որ մագնատն անհետացել է 2017 թվականի հունվարի 27-ին այն բանից հետո, երբ մի խումբ մարդկանց ուղեկցությամբ դուրս է եկել Հոնկոնգի Four Seasons հյուրանոցի իր համարից։ Ինչպես ենթադրում էր հրատարակությունը, գործարարը կարող էր առևանգված լինել չինացի գործակալների կողմից և ուղարկվել մայրցամաք հարցաքննության՝ բորսայում խարդախության հետաքննության հետ կապված:
2017 թվականի սկզբից Չինաստանի ֆինանսական կարգավորիչը արշավ էր սկսել ագրեսիվ բորսային սպեկուլյանտների դեմ, ովքեր զբաղվում էին շուկայում լայնածավալ մանիպուլյացիաներով։