ԱՄՆ Ներկայացուցիչների պալատի ավելի քան 65 անդամ երկու կուսակցություններից միացել են Կոնգրեսի «Հայկական խմբի» ուղերձին 2022թ․ ֆինանսական տարում Հայաստանին և Արցախին օգնություն հատկացնելու վերաբերյալ։
Ինչպես տեղեկացնում է Ամերիկայի Հայ Դատի հանձնախումբը (ANCA), փաստաթղթում կոչ է արվում դադարեցնել անվտանգության ոլորտում Ադրբեջանին տրվող ԱՄՆ ամբողջ օգնությունը, քանի դեռ հաստատված չէ Հայաստանի և Արցախի դեմ հարձակումների դադարեցումը:
Բացի այդ, Ներկայացուցիչների խորհրդի անդամների երկկուսակցական խումբն առաջարկում է 2 միլիոն դոլար ուղղել Լեռնային Ղարաբաղում կոնվենցիոնալ զենքի ոչնչացման ծրագրին, 100 միլիոն դոլար՝ Պետդեպարտամենտի և USAID-ի միջոցով Հայաստանին տնտեսական, կառավարման, օրենքի գերակայության և անվտանգության ոլորտներում աջակցությանը:
Ներկայացուցիչների խորհրդի անդամներ Ֆրանկ Փալոնեն, Ջեքի Սփիերը և Ադամ Շիֆը Կոնգրեսին ուղղված նամակում նշել են, որ 2022թ․ արտասահմանյան հատկացումների մասին օրինագծում Հայաստանի և Արցախի համար ներկայացված հայտը և դրա հետ կապված ծրագրերը որոշիչ նշանակություն ունեն հայ ժողովրդի անվտանգության բարելավմանը, ժողովրդավարության ամրապնդմանը և կայուն տնտեսական զարգացմանը, քաղաքացիական հասարակության կայունացմանն աջակցելու, COVID-19 համաճարակին արձագանքելու և, որ ամենակարևորն է, Արցախում շարունակվող մարդասիրական ճգնաժամը մեղմելու գործում:
«Լեռնային Ղարաբաղի հայ ժողովրդին ուղղակի օգնության հուսալի ֆինանսավորումը պետք է ուղղվի վերականգնման և վերակառուցման աշխատանքներին, ներառյալ՝ բնակարաններով ապահովումը, սննդի անվտանգությունը, ջրամատակարարումը և սանիտարական չափորոշիչները, փախստականներին բժշկական օգնություն և օժանդակություն տրամադրելը, վերականգնողական և ենթակառուցվածքային այլ կարիքներ», - ասվում է փաստաթղթում։
Նամակն ուղղված է Ներկայացուցիչների պալատի Արտասահմանյան հատկացումների ենթահանձնաժողովի ղեկավար Բարբարա Լիին և ընտրված անդամ Հել Ռոջերսին, ով սկսել է մշակել 2022 ֆինանսական տարում արտաքին օգնության օրինագիծը։