Գերմանական ավտոարդյունաբերությունը դժվարություններ է ապրում Ռուսաստանի դեմ պատժամիջոցների պատճառով, ինչը չինական ընկերությունների համար ճանապարհ է բացել ռուսական շուկա դուրս գալու համար։ Schneider Group խորհրդատվական ընկերության ղեկավար Ուլֆ Շնայդերը զգուշացնում է, որ գերմանացի ավտոարտադրողները պետք է շտապեն պահպանել իրենց դիրքերը Ռուսաստանի Դաշնությունում։
«Պատժամիջոցների պատճառով գերմանական ավտոմոբիլային արդյունաբերությունը լուրջ վնասներ է կրել։ Ավտոարդյունաբերության ներկայացուցիչները պետք է ավելի արագ գործեն, որպեսզի երկար ժամանակ չկորցնեն ռուսական շուկան»,- Շնայդերի խոսքերն է մեջբերում Berliner Zeitung-ը։ Նա նշել է, որ Չինաստանը ակտիվորեն գրավել է ավտոմոբիլային և մեքենաշինական արդյունաբերության ազատված տեղը:
Շնայդերի կարծիքով՝ Ռուսաստան գերմանական ավտոմեքենաների մատակարարման սահմանափակումների վերացումը կարող է օգնել վերականգնել պահանջարկը։ Սակայն նա շեշտում է, որ ապագան դժվար է կանխատեսել։ Շնայդերը նաև կարծում է, որ Գերմանիայի և Ռուսաստանի միջև տնտեսական կապերը կարող են վերականգնվել, եթե Ուկրաինայում զինադադար ձեռք բերվի և հույս ունի, որ պատժամիջոցները մասնակի կվերացվեն, քանի որ դրանք հետ են պահում գերմանական բիզնեսը։