Բավ է պառակտվել
06-07-2020 16:03

Կիրիլ Պատրիարքը դեմ է արտահայտվել Սուրբ Սոֆիայի տաճարը մզկիթի վերածելուն

Երկուշաբթի Մոսկվայի և Համայն Ռուսիո Պատրիարք Կիրիլը հանդես է եկել հատուկ հայտարարությամբ՝ կոչ անելով Թուրքիայի իշխանություններին պահպանել Ստամբուլի Սուրբ Սոֆիա տաճարի թանգարանի կարգավիճակը:

Հիշեցնենք, որ Gisher.News-ը մինչ այդ գրել էր, որ Թուրքիայի նախագահ Ռեջեփ Թայիփ Էրդողանը հանձնարարել է ուսումնասիրել Սոֆիան մզկիթի վերածելու հնարավորությունը:

«Հուսով եմ, որ Թուրքիայի ղեկավարությունը խոհեմ կգտնվի: Սուրբ Սոֆիայի՝ քրիստոնեական մշակույթի մեծագույն գլուխգործոցներից մեկի, աշխարհի միլիոնավոր քրիստոնյաների համար խորհրդանշական տաճարի ներկայիս չեզոք կարգավիճակի պահպանումը կնպաստի հետագայում Ռուսաստանի և Թուրքիայի ժողովուրդների միջև հարաբերությունների զարգացմանը, կամրապնդի միջկրոնական խաղաղությունն ու ներդաշնակությունն» - ասված է Կիրիլ Պատրիարքի հայտարարության մեջ:

Ռուս եկեղեցու առաջնորդը նշել է, որ Սուրբ Սոֆիան, որը կառուցվել է VI դարում Քրիստոս Փրկչի պատվին, մեծ նշանակություն ունի ամբողջ ուղղափառ աշխարհի համար և հատկապես թանկ է Ռուս Ուղղափառ եկեղեցու համար: «Մեծ իշխան Վլադիմիրի դեսպանները, մտնելով այս տաճարի շեմից ներս, գերվել են նրա երկնային գեղեցկությամբ: Լսելով նրանց պատմությունը` Սուրբ Վլադիմիրը մկրտվել է և մկրտել Ռուսաստանը, որը դրանից հետո մուտք է գործել իր համար նոր հոգևոր և պատմական իրականություն` քրիստոնեական քաղաքակրթություն», - հիշեցրել է Պատրիարքը:

«Սերնդեսերունդ մեզ փոխանցվել է հիացմունքն այդ քաղաքակրթության ձեռբերումներով, որի մասն եք այսօր մենք», - հավելել է նա ։ - Եվ Սուրբ Սոֆիան եղել և մնում է դրա ակնածանքով պաշտվող խորհրդանիշներից մեկը: Տաճարի կերպարը մտել է մեր մշակույթ ու պատմություն: Այն ուժ է տվել և ոգեշնչել մեր ճարտարապետներին Կիևում, Նովգորոդում, Պոլոցկում՝ Հին Ռուսաստանի հոգևոր ձևավորման բոլոր հիմնական կենտրոններում»:

Պատրիարքը խոստովանել է, որ Ռուսաստանի և Կոստանդնուպոլսի միջև հարաբերությունների պատմության մեջ եղել են տարբեր, երբեմն՝ շատ բարդ ժամանակաշրջաններ, բայց «ռուս ժողովուրդը, ինչպես նախկինում, այնպես և այժմ ցավով և ցասումով է ընկալել և ընկալում Կոնստանդնուպոլսի եկեղեցու հազարամյա հոգևոր ժառանգությունը նվաստացնելու կամ ոտնահարելու ցանկացած փորձ»:

«Սուրբ Սոֆիայի սպառնալիքը սպառնալիք է քրիստոնեական ողջ քաղաքակրթության համար է սպառնալիք, այսինքն՝ մեր հոգևորականության ու պատմության համար։ Մինչև օրս էլ յուրաքանչյուր ռուս ուղղափառի համար Սուրբ Սոֆիան քրիստոնեական մեծ սրբավայր է։ Ցանկացած քաղաքակիրթ պետության պարտքն է պահպանել հավասարակշռությունը, հաշտեցնել հասարակության շրջանում եղած հակասությունները, ոչ թե սրել դրանք, նպաստել մարդկանց միավորմանը, ոչ թե բաժանմանը»,- նշել է Պատրիարքը։

Հիշեցնելով, որ այսօր Թուրքիայի և Ռուսաստանի միջև հարաբերությունները զարգանում են դինամիկ կերպով, նա կոչ է արել հաշվի առնել, որ Ռուսաստանը երկիր է, որի բնակչության մեծամասնությունն ուղղափառ է։ «Եվ այն, ինչ կարող է կատարվել Սուրբ Սոֆիայի հետ մեծ ցավ կպատճառի ռուս ժողովրդին», - ասել է Ռուսաստանի հոգևոր ղեկավարը:

Քննարկումներ Սուրբ Սոֆիայի շուրջ

Ստամբուլի Սուրբ Սոֆիայի տաճարի շուրջ քննարկումները հերթական անգամ ծավալվեցին այն բանից հետո, երբ մայիսի 29-ին՝ Կոստանդնուպոլսի անկման հերթական տարելիցին տաճարում ընթերցվեց Ղուրանը: Մեկ շաբաթ անց Թուրքիայի նախագահ Ռեջեփ Թայիփ Էրդողանը հանձնարարեց ուսումնասիրել Սոֆիայի տաճարը մզկիթի վերածելու հնարավորությունը:

Ավելի ուշ արդարադատության նախարար Աբդուլհամիտ Գյուլը կողմ արտահայտվեց տաճարը մզկիթի վերածելու գաղափարին, նրան հետևեց նաև արտգործնախարար Մևլութ Չավուշօղլուն: Իր հերթին, Թուրքիայի հայոց պատրիարք Սաակ II-ն առաջարկել է, որ Սուրբ Սոֆիայի տաճարը աղոթավայր ծառայի ինչպես քրիստոնյաների, այնպես էլ՝ մահմեդականների համար։ Սոֆիայի տաճարը մզկիթի վերածելուն դեմ են արտահայտվել Ուղղափառ եկեղեցիների ներկայացուցիչները և բարձրաստիճան դիվանագետներն, այդ թվում՝ ԱՄՆ պետքարտուղար Մայք Պոմպեոն:

Սուրբ Սոֆիան թանգարանի կարգավիճակ է ստացել 1934 թվականին Թուրքիայի առաջին նախագահ Մուսթաֆա Քեմալ Աթաթուրքի որոշմամբ։ 1985 թվականից տաճարն ընդգրկված է ՅՈՒՆԵՍԿՕ-ի Համաշխարհային ժառանգության ցանկում: Մինչդեռ նախորդ հինգշաբթի, հուլիսի 2-ին, թուրքիայի գերագույն դատարանը որոշում է կայացրել, որ Ստամբուլի Սուրբ Սոֆիայի տաճարի կարգավիճակը կարող է փոխվել նախագահական հրամանագրով։ իսկ այսօր այդ հարցը քննարկել է երկրի պետական խորհուրդը, որն իր եզրակացությունը կհրապարակի առաջիկա 15 օրվա ընթացքում։

Թուրքիայի դատարանը թույլատրել է Սուրբ Սոֆիայի տաճարը վերածել մզկիթի
Այլ երկրների կարծիքը չի ազդի Սբ․Սոֆիայի կարգավիճակը փոխելու որոշման վրա․ էրդողան
Շուշիի Սուրբ Ամենափրկիչ Ղազանչեցոց մայր տաճարը Ադրբեջանի ռմբակոծությունից հետո (տեսանյութ)
Հնդկաստանում ֆերմերները սպառնում են պաշարել խորհրդարանը, եթե իրենց պահանջները չկատարվեն
Տագնապալի նշաններ ամենուր․ վերջին վեց տարիներն ամենաշոգն են եղել դիտարկումների ամբողջ պատմության ընթացքում․ ՄԱԿ