Հարավային Կորեայի նախագահ Յուն Սուկ Յոլը հայտարարել է, որ կչեղարկի ռազմական դրության հրամանը այն բանից հետո, երբ խորհրդարանը քվեարկեց այն չեղարկելու օգտին, հայտնում է CNN-ը։
Խորհրդարանի որոշումը ռազմական ռեժիմի վերացմանը միաձայն աջակցության արդյունք էր. նիստին ներկա բոլոր 190 պատգամավորները կողմ քվեարկեցին դրա վերացմանը։
Ավելի վաղ Յուն Սուկ Յոլը հայտարարել էր «ռազմական դրություն»՝ մեղադրելով ընդդիմությանը, մասնավորապես Կորեայի դեմոկրատական կուսակցությանը, խորհրդարանը վերահսկելու, Հյուսիսային Կորեային համակրելու և այն գործողությունների մեջ, որոնք, ըստ նրա, կաթվածահար կանեն կառավարությունը։ Նախագահն ասել է, որ այդ քայլն անհրաժեշտ է ազգային անվտանգությունը պաշտպանելու և կայունությունը պահպանելու համար:
Սակայն ռազմական դրություն մտցնելու որոշումը հասարակական լայն ընդվզում և քաղաքական հակազդեցություն առաջացրեց: Ընդդիմությունը հրամանագիրը հակասահմանադրական է անվանել և կոչ է արել քաղաքացիներին զանգվածային բողոքի ցույցեր կազմակերպել, ինչպես նաև զինվորականներին՝ հրաժարվել հրամանները կատարելուց։ Քննադատություն եղավ նույնիսկ իշխող կուսակցության ներսում, որի առաջնորդ Հան Դոնգ Հունը դեմ արտահայտվեց այդ քայլին, այն անվանելով սխալ և խոստացավ աջակցել այն չեղարկելու ջանքերին:
Իրավիճակն ընդգծեց երկրի խորը քաղաքական ճգնաժամը, որտեղ իշխանության և ընդդիմության միջև պայքարը սրվել է կոռուպցիայի և իշխանության չարաշահման փոխադարձ մեղադրանքների ֆոնին: